Украина бўйича тинчлик саммитига АҚШ вице-президенти боради, Байден қатнашмайди

15 июн куни Швейцариянинг Люцерн шаҳрида бўлиб ўтадиган Украина бўйича тинчлик саммитида АҚШ номидан вице-президент Камала Ҳаррис иштирок этади. Бу ҳақда Оқ уй хабар берди. 

«Вице-президент Оқ уй маъмуриятининг Украина суверенитети ва ҳудудий яхлитлиги ҳамда БМТ Низоми тамойилларига асосланган адолатли ва мустаҳкам тинчликка эришиш йўлидаги Украина саъй-ҳаракатларини қўллаб-қувватлашга содиқлигини таъкидлайди», дейилади хабарда. 

Саммит давомида Ҳаррисга миллий хавфсизлик бўйича АҚШ президенти маслаҳатчиси Жейк Салливан ҳамроҳлик қилади.

Украинада тинчликка эришиш бўйича музокараларга бағишланган саммит 15-16 июн кунлари Швейцарияда бўлиб ўтади. Украина президенти Володимир Зеленскийнинг сўзларига кўра, томонлар учрашувда бошқа масалалар қатори ядровий ва озиқ-овқат хавфсизлиги, шунингдек, «бирга бир» формуласи асосида ҳарбий асирларни алмашиш масалаларини муҳокама қилишни режалаштирмоқда. Саммитда 160 давлат иштирок этади, Россия унда қатнашиш учун таклифнома олмаган.

Аввалроқ, Зеленский президент Байденнинг саммитда иштирок этмаслик қарорини танқид қилди. «Менимча, бу жуда кучли қарор эмас. Байден саммитда иштирок этиши керак. Бу, шунингдек, АҚШ реакциясини кутиб турган бошқа лидерлар учун муҳим. Унинг қатнашмаслигини фақат Путин олқишлайди, ҳатто тик туриб олқишлайди», деди у. Bloomberg нашрига кўра, саммит кунлари Байденнинг Калифорниядаги сайловолди кампанияси тадбирларига тўғри келгани учун ҳам у саммитни ўтказиб юборади. 

Россия президенти Владимир Путин саммитдан мақсад турли мамлакатлардан «оломонни» йиғиш, сўнгра қабул қилинган резолюцияларни коллектив қарор деб эълон қилиш ва Россияга «ултиматум» қўйиш эканлигини айтди. «Воқеалар ривожи бундай бўлмайди», деди у.