Евро-2024. Яримфинал
Испания — Франция 2:1
Голлар: Ямал (21), Олмо (25) — Коло-Муани (9).
Испания – Симон, Навас (Вивиан, 58), Начо, Лапорт, Кукуреля, Руис, Родри, Олмо (Мерино, 76), Уилямс (Субименди, 90+4), Ямал (Ферран Торрес, 90+4), Мората (Ойарсабал, 76).
Франция – Менян, Кунде, Упамекано, Салиба, Эрнандес, Канте (Гризманн, 62), Рабио (Камавинга, 62), Чуамени, Дембеле (Жиру, 79), Мбаппе, Коло-Муани (Барколя, 63).
Огоҳлантиришлар: Навас (14), Чуамени (60), Камавинга (89), Ямал (90+1).
9 июл, сешанба оқшомида Евро-2024 турнирида Испания — Франция жамоалари ўртасида илк яримфинал учрашуви бўлиб ўтди.
Бу шунчаки финалга ўтиш баҳси эмас, ғоялар қарама-қаршилиги эди. Испания миллий жамоаси фаворитлар орасидаги энг ёрқин ўйин кўрсатаётган жамоа бўлмоқда, Луис де ла Фуэнте шогирдлари турнирдаги ҳар бир ўйинда фақат ғалаба учун ўйнамоқда. Французлар эса турнирларга хос услуб танлаган ва керакли вақтда куч тежаб ҳаракат қилди, аммо бу кўпроқ антифутболга айланиб кетди. «Учранглилар» умуман ўйиндан гол урмасдан, автогол ва пеналтилар ёрдамида чемпион бўлмоқчидек кўрина бошлаганди.
Испания олдинги босқичда Германия устидан қозонилган ғалабага қурбонликлар эвазига эришганди: Педри жароҳат олди ва бир неча ҳафтага сафдан чиқди, Карваҳал ва Ле Норман дисквалификация туфайли яримфиналда ёрдам бера олмайдиган бўлди. Натижада майдон марказида Педри ўрнига илк дақиқалардан олдинги ўйин қаҳрамони Олмо ҳаракат қилди, ҳимоя марказига Ле Норман ўрнига — Начо, ўнг қанотга Карваҳал ўрнига — Навас жойлаштирилди. Ва бу испаниялик мухлисларда хавотир уйғотганди: 38 ёшли фахрий футболчи Мбаппенинг реактив тезлигига дош беролмади? Дешам эса бу сафар ҳам Гризманни стартда туширмади ва кўпчиликнинг ҳафсаласини пир қилди. Французлар 2014 йилги мундиалдан буён илк бор катта турнир плей-оффида Антуансиз ўйинни бошлади. Дешам Гризманнинг ижодкорлигидан кўра Дембеле ва Коло Муанининг тезлигига таянишни афзал кўрди.
Французлар тезкор гол уришди. Ниқобини ечиб чиққан Мбаппе чап қанотдан ёриб кириб, узоқ устун томондаги Коло Муанини голли пас билан таъминлади. Французлар Еврода ўйиндан урилган илк голини нишонлашди. Навас учун эса ўйин даҳшатли бошланди — Килиан айнан ундан ўтиб кетиб, тўпни шеригининг бошига етказиб берганди, бир неча дақиқа ўтиб эса майдондаги энг тажрибали футболчи сариқ карточка олди.
