Қўшимча функционаллар
-
Тунги кўриниш
Россияда қаровсиз қолган 7 бола Ўзбекистонга қайтарилди
Болалар тегишли марказга жойлаштирилган. Улар кейинроқ ота-онаси ёки уларнинг ўрнини босувчи шахсларга топширилади.
Россияда қаровсиз қолиб кетган 7 нафар бола Ўзбекистонга олиб келинди. Daryo.uz’нинг ёзишича, Россияда оғир вазиятга тушиб қолган 10 нафардан ортиқ хотин-қизларни ҳам Ўзбекистонга қайтариш чоралари кўрилмоқда.
Маълум қилинишича, Оила ва хотин-қизлар қўмитаси раиси Озода Парпибоева бошчилигидаги турли масъул ташкилотлар вакилларидан иборат делегация Россия Федерациясининг Санкт-Петербург шаҳрида хизмат сафарида бўлиб қайтган.
Ташриф жараёнида қатор фирма ва ташкилотларда меҳнат қилаётган 300 нафардан ортиқ хотин-қизларнинг меҳнат шароитлари ўрганилган ва улар билан яқиндан суҳбатлашилган. Жараёнда оғир вазиятга тушиб қолган 10 нафардан ортиқ хотин-қизларнинг мамлакатга қайтишига кўмаклашиш бўйича чора-тадбирлар белгиланган.
Россия Федерациясининг вояга етмаганларга ижтимоий-ҳуқуқий ёрдам кўрсатиш марказларида сақланаётган, ота-онаси томонидан қаровсиз ёки назоратсиз қолдириб кетилган 7 нафар бола Ўзбекистонга қайтарилган. Улар тегишли марказга жойлаштирилган.
Қайд этилишича, болалар кейинроқ ота-онаси ёки уларнинг ўрнини босувчи шахсларга топширилади.
