Эстония бош вазири Кая Каллас истеъфога чиқди

Эстония бош вазири Кая Каллас 15 июл, душанба куни янги иш жойига ўтиши муносабати билан истеъфога чиқди – у Европа Иттифоқининг ташқи ва хавфсизлик сиёсати бўйича олий вакили лавозимини эгаллайди. У аввалроқ Европа Иттифоқининг ташқи сиёсат бўйича раҳбари лавозимига номзод этиб кўрсатилган эди.

Кая Каллас номзоди ҳали ҳам Европарламент томонидан тасдиқланиши керак, бироқ Европа комиссиясининг янги таркибини тузадиган коалиция керакли кўпчилик овозга эга, шунинг учун Калласнинг Европа дипломатияси раҳбари лавозимига тайинланиши аниқдир. Кая Каллас билан биргаликда бутун Эстония ҳукумати истеъфога чиқди.

Янги вазирлар маҳкамаси тузилгунга қадар Каллас бош вазир вазифасини бажаради. Эстонияда ҳукмрон коалиция таркиби ўзгармаслиги ва Каллас вакили бўлган либерал Ислоҳотлар партияси бош вазирликка номзод кўрсатиши кутилмоқда. Афтидан, бу Кристен Михал бўлади.

Россиянинг Украинага қарши урушини танқид қилиш

Кая Каллас 2021 йилда Эстония бош вазири лавозимини эгаллаган. Бошқа Болтиқбўйи мамлакатлари етакчилари сингари у Россияни Украинага қарши урушда кескин танқид қилади ҳамда мудофаа ва бошқа соҳаларда Украинани доимий равишда қўллаб-қувватлайди.

Бироқ, ўтган йили эстониялик журналистлар Кая Калласнинг эри Арво Ҳаллик компанияси Россиянинг Украинага қуролли ҳужуми бошланганидан кейин ҳам Россияга маҳсулот етказиб беришда давом этганини аниқладилар. Каллас эрининг компанияси фаолиятига ҳеч қандай алоқаси йўқлигини таъкидлаб, истеъфога чиқишдан бош тортди.

Эстония хавфсизлик полицияси Россияга қарши санкциялар режими бузилмаган ва Ҳаллик фаолиятига нисбатан ҳеч қандай қонуний даъво йўқ, деган хулосага келди. Ҳалликнинг ўзи компаниядаги акциялардан халос бўлишини ва лавозимидан кетишини ваъда қилган.