Кая Каллас: Йирик давлатлар ЕИни бўлиб ташлашга уринмоқда

Европа Иттифоқининг ташқи ишлар ва хавфсизлик сиёсати бўйича олий вакили Кая Каллас Россия, АҚШ ва Хитой манфаатлари парчаланган Европа билан боғлиқ эканини билдирди. Унинг фикрича, ушбу давлатлар Евроиттифоқнинг кучли ва бирлашган бўлишини истамайди.

Фото: picture alliance

Politico нашрининг ёзишича, Каллас бу ҳақда 17 май куни Таллиннда бўлиб ўтган Леннарт Мери конференциясида сўзлаган.

“Нега бу давлатлар Евроиттифоқни парчалашни хоҳлайди? Чунки биз бирга бўлсак, анча кучли бўламиз”, — деди у.

Калласга кўра, Россия, Хитой ва АҚШ ЕИни ёқтирмаслигининг асосий сабаби — Европа давлатлари бирлашган ҳолда тенг куч сифатида ҳаракат қила олишидир.

“Агар биз бирга ҳаракат қилсак, кучлимиз. Албатта, катта блокка қараганда кичик давлатлар билан алоҳида ишлаш осонроқ”, — деди ЕИ бош дипломати.

Унинг таъкидлашича, “мен сиз билан яхши муносабатдаман, лекин Евроиттифоқни ёқтирмайман” мазмунидаги риторика АҚШнинг “бўлиб бошқар” стратегиясининг бир қисми ҳисобланади.

Шу муносабат билан Каллас ЕИга аъзо давлатларни Вашингтон билан икки томонлама келишувлар орқали иттифоқни заифлаштирмасликка чақирди.

“Баъзи давлатлар шу йўлдан кетаётганини кўриб, жиддий хавотирдаман. Бўлиниш ҳақиқатан ҳам иш бермоқда”, — деди у.

Politico қайд этишича, Дональд Трампнинг иккинчи президентлик муддати бошланганидан кейин айрим Европа давлатлари Вашингтон билан алоҳида алоқаларни сақлаб қолишга ҳаракат қилган. Масалан, Италия бош вазири Жоржа Мелони Европа ва АҚШ ўртасида воситачи бўлишга уринган, аммо бу стратегия Трампнинг папа Лев XIVни танқид қилиши ортидан муваффақиятсиз тугаган.

Аввалроқ Кая Каллас Россия президенти Владимир Путиннинг Германиянинг собиқ канцлери Герхард Шрёдерни Россия билан тинчлик музокараларида ЕИ вакили сифатида тайинлаш таклифини ҳам рад этган эди.

“Агар Россияга бизнинг номимиздан музокарачи тайинлаш ҳуқуқини берсак, бу унчалик оқилона қарор бўлмайди”, — деган Каллас 11 май куни Брюсселдаги ЕИ ташқи ишлар вазирлари йиғини олдидан.