Ўзбекистон Кипр бизнеси билан қўшма лойиҳаларни амалга оширмоқчи

Ўзбекистон ТИВда Кипр Республикаси бизнеси билан қўшма лойиҳаларни амалга ошириш масалалари муҳокама қилинди.

Фото: ТИВ

Ўзбекистон ташқи ишлар вазирининг ўринбосари Музаффар Мадраҳимов Кипр Республикаси Савдо-саноат палатаси президенти Ставрос Ставроу билан учрашув ўтказди.

ТИВ маълумотига кўра, учрашувда иқтисодий дипломатияни фаол ривожлантириш, савдо-саноат палаталари ўртасида ҳамкорликни ўрнатиш, икки мамлакат ишбилармон доиралари ўртасида шериклик алоқаларини йўлга қўйиш масалалари муҳокама қилинди. Шу нуқтайи назардан, мамлакат бозорига киришга қизиқиш билдирган Кипр Республикасининг етакчи компаниялари вакилларининг Ўзбекистонга ташрифини ташкил этишга ўзаро тайёрлик билдирилди.

Томонлар, шунингдек, "яшил" энергетика, тўқимачилик, туризм инфратузилмасини модернизация қилиш каби соҳаларда қўшма лойиҳаларни амалга ошириш масалаларини ҳам муҳокама қилдилар.

Тайёрлаган: Отабек Матназаров

#Кипр #бизнес