Украина Россия нефтининг Венгрияга транзитини тўсиб қўйди

Россиянинг “Лукойл” нефт-газ компаниясига қарши Украина санкциялари кучайтирилгани сабабли Россия Федерациясидан нефт энди “Дружба” нефт қувури орқали Венгрияга етиб бормайди. Бу ҳақда 17 июл, чоршанба куни Bloomberg ёзганидек, Венгрия ташқи ишлар вазири Петер Сийярто россиялик ҳамкасби Сергей Лавров билан Ню-Йоркда БМТ Хавфсизлик кенгаши йиғилиши доирасидаги учрашувдан сўнг айтиб ўтди.

“Украинада ҳуқуқий вазият юзага келди, унга кўра, “Лукойл” ҳозирда Венгрияга маҳсулот етказиб бермаяпти”, — дея Сийярто сўзларини келтиради нашр. 

Венгрия ТИВ раҳбарининг қўшимча қилишича, “Лукойл” ва Венгриянинг MOL энергетика компанияси ҳозирда қувур орқали нефт етказиб беришни тиклаш бўйича “қўшма ҳуқуқий ечим устида ишламоқда”. 

Россия Федерацияси Венгрияга нефтни Украина ҳудудидан ўтувчи “Дружба” нефт қувурининг жанубий тармоғи орқали етказиб берган. Ўтган йили Россия Федерациясидан Венгрияга нефт ҳажми 2022 йилга нисбатан 2 фоизга камайди, бироқ Будапешт Россиянинг Украинага қарши урушига қарамай, Москва билан энергетика алоқаларини мустаҳкамлашда давом этди ва Россия табиий газини етказиб беришни кўпайтириш бўйича бир нечта шартномаларни имзолади.

Киев 2018 йилда “Лукойл”га қарши санкцияларни жорий қилган, бироқ 2024 йил июнида уларни сезиларли даражада кенгайтирган, хусусан, Россия компанияси маҳсулотларининг Украина орқали транзитига тақиқ киритилди.