Словакияга Украина орқали «Лукойл»дан нефт етиб келиши тўхтади

Словакия Венгрия ортидан, Украина санкцияларини кучайтиргани сабабли, «Лукойл»дан нефт олишни тўхтатди.

Фото: Maksim Konstantinov/Russian Look/picture alliance

Россия «Лукойл» компаниясининг нефти Словакияга етиб бориши Киев томонидан «Лукойл» маҳсулотини Украина орқали транзит қилишга қўйилган тақиқ туфайли тўхтаб қолди. Бу ҳақда 18 июл, пайшанба куни Словакия Иқтисодиёт вазирлиги маълум қилди.

«Transpetrol («Дружба» нефть қувурининг Словакия участкаси оператор компанияси) маълумотларига кўра, Россия нефтини Словакияга етказиб бериш тўхтатилмаган, муаммо фақат маълум бир ишлаб чиқарувчи - «Лукойл»дан етказиб беришда», дея аниқлик киритди Молия вазирлиги.

Шу билан бирга, Transpetrol Украина кенгайтирилган санкциялар рўйхатида бўлмаган бошқа россиялик экспортёрларнинг нефти Украина орқали Словакияга етиб боришда давом этаётганини билдирди. Reuters агентлиги Украина энергетика соҳасидаги манбасига таяниб, Украина орқали Европа мамлакатларига нефт транзити «режага мувофиқ» кетаётганини ёзмоқда.

Венгрия ҳам «Лукойл» нефтини олишни тўхтатди

Бир кун аввал Венгрия ташқи ишлар вазири Петер Сийярто «Лукойл» компаниясига нисбатан Украина санкциялари кучайтирилгани муносабати билан Россия Федерациясидан нефт Венгрияга «Дружба» қувури орқали етказиб берилмаётганини айтди. Сийярто сўзларига кўра, «Лукойл» ва Венгриянинг MOL энергетика компанияси ҳозир қувур орқали нефт таъминотини тиклаш учун «қўшма ҳуқуқий ечим устида ишламоқда».

Июн ойида Киев «Лукойл»га қарши санкцияларни кенгайтирди, хусусан, Россия компанияси маҳсулотларининг Украина орқали транзитига тақиқ қўйилди. «Лукойл» Венгрия ва Словакияга асосий хомашё етказиб берувчи ҳисобланади.