Европанинг 47 давлати етакчилари Украинага кейинги ёрдамни муҳокама қилди

Британияда Европа сиёсий ҳамжамиятига аъзо давлатларнинг тўртинчи саммити бўлиб ўтди. 47 давлат раҳбарлари Украинага ёрдам бериш, ноқонуний миграцияга қарши кураш ва бошқа мавзуларни муҳокама қилди.

Фото: Reuters

18 июл, пайшанба куни Британияда Европанинг 47 давлати давлат ва ҳукумат раҳбарлари йиғилди. Европа cиёсий ҳамжамиятининг жорий, тўртинчи саммити Европа Иттифоқининг 27 та давлати ва Албаниядан Украинагача бўлган 20 та учинчи давлатни ўз ичига олган. Тадбир Британиянинг янги бош вазири Кир Стармер томонидан ўтказилди.

Стармер саммитда Украинага Россиядан ўзини ҳимоя қилишда қўшимча ёрдам кўрсатиш, ноқонуний миграцияга қарши кураш, шунингдек, хавфсизлик ва энергетика масалаларини муҳокама қилди. Саммит анжуманида Германиядан канцлер Олаф Шолц иштирок этди.

Унда Франция президенти Эммануэл Макрон ҳам иштирок этиши кутилганди. Айнан у Европанинг келажаги ҳақида сиёсий ва стратегик мунозаралар учун ташкил этилган ҳукуматлараро ташкилот бўлган Европа сиёсий ҳамжамиятини яратиш ташаббускори эди. Макрон ҳамжамиятни яратиш ташаббуси билан 2022 йил май ойида, Россиянинг Украинага қуролли ҳужуми бошланганидан кўп ўтмай чиқди.