Полша Ўзбекистонда фармацевтика саноатида қўшма лойиҳаларни амалга ошириш имкониятини ўрганмоқда

"Дунё" хабарига кўра, ташриф мамлакатнинг Варшавадаги элчихонаси ва "Европа-Ўзбекистон" Иқтисодий ҳамкорлик уюшмаси кўмагида ташкил этилди. Делегация таркибидан Polpharma Group ва Adamed каби Полшанинг энг етакчи фармацевтика компаниялари вакиллари жой олди.

Сафар давомида Полша томони Ўзбекистон Соғлиқни сақлаш вазирлиги, Инвестициялар, саноат ва савдо вазирлиги, Фармацевтика тармоғини ривожлантириш агентлиги, "Фармацевтика маҳсулотлари хавфсизлиги маркази" давлат муассасаси раҳбарияти билан икки томонлама учрашувлар ўтказди. Шунингдек, Tashkent Pharma Park кластери фаолияти билан яқиндан танишди.

Музокаралар давомида Polpharma Group ва Adamed каби етакчи поляк компанияларининг Ўзбекистон фармацевтика саноатига инвестиция киритиш режалари ва имконияти, инвесторлар учун яратилган шарт-шароитлар, шунингдек, мамлакат сармоявий жозибадорлигини ошириш учун зарур меъёрий-ҳуқуқий ҳужжатларга киритилган ўзгартиришлар билан боғлиқ масалалар муҳокама қилинди.

Музокаралар натижасида фармацевтика саноати соҳасида икки томонлама ҳамкорликни йўлга қўйиш бўйича келишувга эришилди.