Европадаги еттита давлат Венесуэлани президентлик сайлови натижаларини исботлашга чақирди

Германия, Франция, Италия, Испания, Польша, Нидерландия ва Португалия «Венесуэладаги президентлик сайловларидан кейин юзаган келган вазиятдан чуқур хавотирда эканини» билдириб, мамлакат ҳукуматини аҳоли президент Николас Мадуронинг ғалабасидан норози бўлаётгани сабаб сайловчилар рўйхатини эълон қилишга чақирди.

«Венесуэла ҳукуматини шаффоф ва ҳалол сайлов жараёнини тўлиқ кафолатлаш мақсадида зудлик билан барча ҳисоб варақаларини эълон қилишга чақирамиз», — дейилади Европа Иттифоқининг еттита давлати қўшма баёнотида.

Ҳужжатда Венесуэла мухолифатининг барча сайлов участкалари тўлдирилган 80 фоиздан ортиқ бюллетенларни тўплаб, эълон қилганига оид маълумотларга таянилган. «Ушбу текшириш Венесуэла халқининг иродаси тан олиниши учун зарур», — дейди Европа давлатлари етакчилари.

Шунингдек, баёнотда халқ иродасини ифода этган венесуэлаликларнинг «ҳар қандай ҳибсга олинишлари» қораланган ва «тинч намойишлар ва эркин йиғинлар» ўтказиш ҳуқуқига риоя этишга чақирилган.

Венесуэлада ўтказилган президентлик сайловларидан кейин Николас Мадуро учинчи муддатга мамлакат раҳбарлигига сайланди ва расмийлар намойишчиларга қарши қатъий чоралар кўрилишини эълон қилди. Ўз тарафдорлари қаршисида чиқиш қилган Мадуро норозилик намойишлари давомида 2 минг киши қўлга олинганини айтди. У қўлга олинганларни Токорон ва Токуйитодаги қаттиқ тартибли қамоқхоналарга юборишга ваъда берди. «Бу сафар раҳм қилинмайди», — дея таҳдид қилди Мадуро.

Шу куннинг ўзида мамлакат бўйлаб норозилик намойишлари авж олди, ҳибсга олиниш хавфи сабаб бир неча кундан бери яшириниб келаётган мухолифат етакчиси Мария Корина Мачадо Венесуэла пойтахтидаги митингда чиқиш қилди. Унинг айтишича, Венесуэла ҳукуматининг рақиблари ҳеч қачон ҳозиргидек кучли, режим эса кучсиз бўлмаган. «Биз кўчалардан кетмаймиз», — дея таъкидлаган Мачадо.

Июль охирларида Венесуэлада президентлик сайловлари бўлиб ўтди. Венесуэла Миллий сайлов кенгаши амалдаги давлат раҳбари Николас Мадуро 51,2 фоиз овоз билан учинчи олти йиллик муддатга қайта сайланганини маълум қилди. 

Мухолифат сайлов натижалари сохталаштирилганини даъво қилмоқда. Сайлов натижаларига қарши намойишчилар ва хавфсизлик кучлари ўртасидаги тўқнашувларда 17 киши, жумладан, ҳарбий хизматчи ҳалок бўлган.