Путин Курск вилоятидаги жанглар ҳақида: «Катта миқёсдаги провокация»

Россия президенти Владимир Путин Украина Қуролли кучларининг Москвадан 500 км узоқликдаги Курск вилояти билан чегарани кесиб ўтганини «кенг кўламли провокация» деб баҳолади. Давлат раҳбари 7 август, чоршанба куни ҳукумат аъзолари билан бўлиб ўтган йиғилишда нутқ сўзлади. Кейин ҳуқуқни муҳофаза қилувчи идоралар раҳбарлари иштирокида йиғилиш ўтказди. Унда мудофаа вазири Андрей Белоусов, Россия Хавфсизлик кенгаши котиби Сергей Шойгу ва Федерал хавфсизлик хизмати директори Александр Бортников иштирок этди. Ҳисоботни Қуролли кучлар Бош штаби бошлиғи Валерий Герасимов тақдим этди.

Курск вилоятида Украина Қуролли кучларининг олға силжиши

Герасимов сўзларига кўра, Курск вилоятининг Суджанский тумани ҳудуди бир қисмини эгаллаб олиш учун олдинга чиққан Украина ҳарбий кучлари сони «минг кишигача» бўлган.

«Душманнинг йўқотишлари 315 кишини ташкил этди, шу жумладан камида 100 киши ҳалок бўлди ва 215 та зирҳли техника, 7 та танк йўқ қилинди», деди у. Герасимов сўзларига кўра, Украина Қуролли кучларининг Курск йўналиши бўйича Россияга чуқур кириб бориши «тўхтатилган».

Материални чоп этиш вақтида Россия томонининг баёнотларини текшириш имкони йўқ. Украина Қуролли кучлари вакиллари ҳозирча бу баёнотга изоҳ бермаган.

ОАВ: Россия газини ўтказиш одатдагидек давом этмоқда

Айни пайтда, Россия Мудофаа вазирлигига яқин бўлган "Рыбарь" Telegram-канали Украина Қуролли кучлари бўлинмалари Суджанинг ғарбий чекка ҳудудларига кириб, шаҳар жанубига қараб илгарилаб кетганини даъво қилмоқда. Бундан ташқари, унинг версиясига кўра, Украина Қуролли кучларининг илғор зирҳли гуруҳи Коренево чегараларига етиб борган. Газ Европага ўтадиган "Суджа" газ ўлчаш станцияси ҳам қўлга олинди, деб ёзади "Рыбарь". Бу маълумот ҳали расман тасдиқланмаган.

Reuters агентлиги Украина транзит операторига таяниб хабар беришича, Россия табиий газининг Украина орқали ўтиши одатдагидек давом этмоқда – тўқнашувлар ҳақидаги хабарларга қарамай.

Курск вилояти губернатори вазифасини бажарувчи Алексей Смирнов сўнгги 24 соат ичида Курск вилоятида ўққа тутилган ҳудудни минглаб одамлар тарк этганини айтди. «Бир кечада бир неча минг киши ўққа тутилган ҳудудни шахсий транспортида тарк этди, ҳудудда 2,5 минг ўринли янги вақтинчалик турар жой марказлари жойлаштирилди», деди Смирнов. Унинг сўзларига кўра, «отишма ҳудудларидан 200 дан ортиқ одам олиб чиқилган».

Шу билан бирга, "7х7" журналисти Екатерина Лобановская аввалроқ DW нашрига «марказлаштирилган эвакуация умуман йўқ, одамлар ўзи кетяпти, маъмуриятдан ёрдам йўқлигини» айтди.

Суми вилоятида эвакуация

Айни вақтда, Украинанинг Суми вилоятининг беш туманидаги 23 та аҳоли пунктида аҳолини мажбурий эвакуация қилиш жорий этилди, дея хабар берди вилоят ҳарбий маъмурияти бошлиғи Владимир Артюх Украина миллий телемарафони эфирида.

6 август куни эрталаб Курск вилояти расмийлари, кейинроқ Россия Мудофаа вазирлиги Украинадан Россия чегарасини бузиб ўтишга уриниш ҳақида эълон қилди. Россия Мудофаа вазирлиги захира кучлар минтақага ўтказилишини билдирди.