Киевга Зеленский билан учрашувга борган россиялик тадбиркор Роман Абрамович бўлиб чиқди

2026 йил майида Киевга борган ва Володимир Зеленский билан учрашган россиялик тадбиркор Роман Абрамович эди. Бу ҳақда Financial Times нашри вазиятдан хабардор бўлган манбаларга таяниб хабар тарқатди. Украина президенти айнан ундан Владимир Путинга ўзаро учрашув бўйича таклифни етказишни сўраган.

Абрамович катта уруш бошида ҳам Киев ва Москва ўртасидаги музокараларда воситачилик қилганди. FT нашри 2022 йилда уни Путиннинг «ишончли вакили» деб атаган, Зеленский эса АҚШдан унга қарши қўлланиши режалаштирилган санкцияларни кейинроққа суришни сўраганди. Financial Times нашрининг тадбиркорга яқин бўлган суҳбатдошларига кўра, ҳозирда роли яққол сезилмаётган бўлса-да, у ҳамон музокараларда иштирок этмоқда.

«У шунинг учун керакки, у улар тоқат қила оладиган ягона россияликдир. У ҳамма билан тил топиша олади», – деган FT суҳбатдошларидан бири. Абрамовичнинг фикрича, Зеленский «етакчилар билан учрашувда ўз шахсий харизмаси сеҳри орқали барчасини ҳал қила оламан» деб ўйлайди.

Нашр суҳбатдошларига кўра, Романович Украина президентининг ҳаракатларини КВНдаги «капитанлар конкурси» билан таққослайди – Зеленский шоу-бизнес ва сиёсатга кириб келишидан олдин КВН юлдузи эди. «Путин бунга мутлақо қизиқмайди. Бу Трамп учун ҳам иш бермайди. Аммо Зеленский бор эътиборини шунга қаратган», – дея қўшимча қилади манба.

Украиналик икки юқори мартабали мулозимнинг айтишича, Зеленскийнинг ўзаро учрашув ҳақида Абрамович орқали май ойида юборган таклифи унинг 4 июн куни эълон қилинган очиқ хати билан ўхшаш бўлган. Аммо май ойидаги таклиф оҳанги «бу каби душманона руҳда эмасди», дейишади улар.

Украина президенти офисидагилар бу борада изоҳ беришдан бош тортишган. Кремл ва Абрамовичнинг вакиллари эса FT нашри сўровини жавобсиз қолдиришган.

Россиялик тадбиркорлардан бири Зеленский билан учрашиш учун Киевга боргани ҳақида 5 июн куни Путин Петербург халқаро форуми ялпи сессиясидаги чиқишида айтиб ўтганди. У тадбиркорнинг номини очиқламаганди. Россия президенти уч ҳафта муқаддам ўша тадбиркор Киевга келиш бўйича таклиф олганидан хабардор қилгани, шундан кейин Киевга бориб, Зеленский билан унинг қароргоҳида учрашганини айтганди.

У қайтганидан кейин Путинга Зеленский учрашув сўраётганини етказган. Бунга жавобан Путин ҳеч қачон учрашувдан бош тортмаслиги, аммо «қуруқ гап сотиш»дан маъно кўрмаётганини айтганди.

«Бу менимча, 21 май куни бўлганди. 22 май куни эса украин қўшини Луганск халқ республикасидаги коллеж ётоқхонасига даҳшатли террорчилик зарбасини йўллаб, болалар ва ўсмирларни ўлдирди», – дейди Путин. У тадбиркорга «улар учрашув сўраши ва ортидан бундай қўрқинчли жиноят содир этиши нимани англатиши» ҳақида сўраган. У бунга жавобан ҳеч нарса дея олмаслигини, аммо Киевдан қўнғироқ кутаётганини айтиб, кейинроқ алоқага чиқишини билдирган. Шундан кейин улар гаплашмаган.

Кейинроқ Путиннинг ёрдамчиси Юрий Ушаков Киевга «кўпчилик танийдиган анча йирик бизнесмен» борганини айтди, аммо у ҳам шахсни очиқламади. 6 июн куни Олий рада депутати Алексей Гончаренко ҳам ўз манбасига таяниб, Зеленский билан учрашувга Абрамович келганини хабар қилди.

7 июн куни эса Зеленскийнинг ўзи Sky News учун интервюсида Абрамович билан учрашганини тасдиқлади.

«У Киевга келди. У шундай деди: „Менда бевосита ўзингизга хабар бор ва мен сиздан жавоб олиб, уни Путинга етказаман“. Аммо буни ҳеч кимга сездирмай қилиш кераклигини таъкидлади. Мен шундай жавоб қилдим: „Бу сизнинг ишингиз. Бизга ошкора ёки махфий бўлишининг фарқи йўқ“», – деди Украина президенти. 

Зеленскийнинг фикрича, Абрамович Киев тинчлик музокаралари масаласида нималарга тайёрлигини билишни истаган. Зеленский унга Украина Донбассни Россияга бермоқчи эмаслигини билдирган. 

«Бу асосий хабар эди. Мен кетмаслигимизни, уларга бундай қилиб ғалабани бермаслигимизни айтдим», – дея қўшимча қилади Зеленский. Улар томонлар қайси масалаларда ён беришга тайёрлигини ҳам муҳокама қилишган. Зеленский Абрамовичга фақат ўт очиш тўхтатилганидан кейин муроса қилиш мумкинлигини айтган.