“Сувдан ҳам жиддийроқ муаммо – ернинг шўрланиши бўляпти” - қишлоқ хўжалиги вазири

Тошкентда шу кунларда денгизга чиқа олмайдиган давлатларнинг озиқ-овқат хавфсизлиги масаласи муҳокамадан ўтмоқда. Асосий эътибор қишлоқ хўжалиги маҳсулотлари экспорти, савдодаги тўсиқлар, маҳсулотларни тўғри тақсимлаш масалаларига қаратилди. Қишлоқ хўжалиги вазири Иброҳим Абдураҳмонов ернинг шўрланиши муаммосига тўхталиб, бу сув танқислигидан ҳам жиддийроқ эканини айтди.

Форумда 32 давлатдан вакиллар қатнашди. Иқлим ўзгаришига мослашиш, унинг ҳосилдорликка таъсирини камайтириш Марказий Осиёдек йилдан-йилга об-ҳавоси исиб бораётган регион учун муҳим. Шунингдек, денгизга чиқиш чекланган бир шароитда логистика муаммоларини ҳал қилиш ҳам давлат даражасидаги масала. Вазир Иброҳим Абдураҳмонов фикрича, ҳукуматнинг қарорлари оддий инсонлар-у, фермерларга зарар келтирмаслиги керак.

Қишлоқ хўжалигидаги энг катта муаммо бугун ерларнинг шўрланиши. Ҳосилдорликни оширишга қаратилган ҳар қандай технологиялар охир-оқибат тупроқ шўрланишига олиб келмоқда. Бу сувдан ҳам жиддийроқ муаммо, дейди вазир Абдураҳмонов.

Шу йилнинг баҳор ойларида пиёз мўл-кўл бўлиб, деҳқонлар уни сота олмай, маҳсулот далаларда қолиб кетди. Ёзда эса тарвузнинг нархи рекорд даражада пастлаб, тонна-тонна тарвузлар исроф бўлди. Қишлоқ хўжалиги вазирига кўра, бунга экин экишдаги эркинлик сабаб бўлган. Деҳқонларга эркинлик бердик, нима экишни давлат белгиламади. Табиийки, ҳамма хоҳлаганини экди ва шу ҳолат юз берди, дейди вазир.

Экология вазири Азиз Абдуҳакимов эса аввало исрофгарчиликнинг олди олиниши кераклигини айтди. Бир дона олманинг исроф бўлиши 70 литр сувнинг исроф бўлиши дегани. Одамларнинг ўзи сувнинг қадрини билиши керак, дейди у.

Эслатиб ўтамиз, дунёда йилдан-йилга озиқ-овқат маҳсулотларининг нархи ошиб бормоқда. Масалан, Европа давлатларидаги қурғоқчилик ҳамда Украина уруши ортидан дон етиштириш муаммога айланган. Қурғоқчилик эса ҳосилнинг бой берилишига сабаб бўляпти. Гуруч етказиб берувчи асосий давлатларда шолизорларни ўғитлар билан озиқлантиришнинг имкони бўлмагани ҳам ҳосилдорликни камайтирмоқда. Шундай шароитда ҳар бир давлат озиқ-овқат захираси, унинг хавфсизлиги ҳақида бош қотириши лозим.