Эйнштейннинг Рузвелтга ёзган хати кимошди савдосида қарийб 4 млн долларга сотилди

Физик олим Алберт Эйнштейннинг АҚШ президенти Франклин Рузвелтга йўллаган мактуби Christie’s кимошди савдосида 3,992 миллион долларга сотилди.

Ҳамкасби Лео Силард билан биргаликда Эйнштейн Қўшма Штатларнинг 32-президентига Германия томонидан “ўта кучли бомбалар” яратилиши хавфи ҳақида хабар берган. Ҳозир ҳужжатнинг асл нусхаси Ню-Йоркдаги президент кутубхонасида сақланмоқда. Сотилган лот хатнинг иккинчи, қисқароқ версияси бўлиб, унда олимларнинг ядровий тадқиқотларни қўллаб-қувватлаш бўйича тавсиялари йўқ.

Бунга қадар Эйнштейннинг мактубига Microsoft ҳамтаъсисчиси Пол Аллен эгалик қилиб келган. У хатни 2002 йилда ношир ва сиёсатчи Малколм Форбсдан 2,1 миллион долларга сотиб олганди. Ўша пайтда бу XX асрнинг энг қимматли тарихий ҳужжати эди.

Эйнштейннинг масса ва энергия эквиваленти формуласи ёзилган яна бир машҳур мактуби 2021 йил май ойида 1,2 миллион долларга сотилганди. Ярим йил ўтгач Париждаги Christie’s кимошди савдосида физикнинг нисбийлик назарияси бўйича қўлёзмаси 11 миллион еврога сотиб олинди.

Аввалроқ АҚШда чордоқдан топилган портрет 1,4 млн долларга сотилгани хабар қилинганди. XVII асрга тегишли экани айтилаётган ушбу картина нидерландиялик машҳур рассом Рембрандт томонидан чизилган бўлиши мумкин.