100 млн долларлик қадимий тангалар коллекцияси аукционга қўйилади

15 мингга яқин қадимий олтин ва кумуш тангалардан иборат коллекция Numismatica Ars Classica (НАC) кимошди савдосига қўйилди. Лот 100 млн долларга баҳоланмоқда, деб ёзади Financial Times.

Тангалар исми ошкор этилмаган европалик эркакка тегишли бўлиб, у уларни 1930 йиллардан тўплай бошлаган. Иккинчи жаҳон уруши даврида коллекционер тангаларни ўз боғига кўмиб қўйган. Хазина 50 йилдан зиёд ер остида турган.

Эркак тангаларнинг аксариятини сигарет қутиларига жойлаштириб, сўнг уларни алюминий қутиларга беркитган. Коллекционер хазинанинг қаердалигини фақат хотинига айтган, нацистлар Европага бостириб келганидан кейин эркак инсултдан вафот этган.

Унинг рафиқаси 1990 йилларнинг ўрталарига келиб тангаларни қазиб олишга аҳд қилган. Кейинчалик у хазинани рўйхатга олиш ва баҳолаш учун NAC ташкилотига мурожаат қилди. Аукцион уйи раҳбари Артуро Руссонинг айтишича, тўпламни каталогларга киритиш жараёни бир йилдан ортиқ вақтни олган.

Тўпламда Британия соверенларидан тортиб Муқаддас Рим империясининг 1,4 миллион доллар қийматидаги 100 дукатлик олтин тангасигача бўлган экспонатлар мавжуд. Уларнинг орасида бир донаси 1000 фунт стерлингдан сал арзонроқ сотилиши мумкин бўлган тангалар ҳам бор.

Тўпламнинг умумий нархи бу каби лотлар тарихидаги энг юқори кўрсаткичга етди. NAC уларни тўрт йил мобайнида босқичма-босқич 15 та кимошди савдосига қўйишни режалаштирмоқда. Биринчи савдо 20 май куни ўтказилади.