Норвегия Россия билан чегарада радиация даражаси ортиб кетганини аниқлади

Норвегия радиация ва ядровий хавфсизлик бўйича агентлиги (DSA) Россия билан чегара радиация даражаси нормал даражадан ортиб кетганини қайд этди, деб хабар беради Barrents Obsever.

DSA’нинг қайд этишича, иккита радиацион кузатув станцияси — Викшёфелл ва Сванховддан олинган намуналарда цезий-137 излари топилган. У атом реакторлари учун мўлжалланган ёқилғи турига кирадиган ва ядровий қуролнинг асосини ташкил этадиган уран-237 парчаланиши оқибатида ҳосил бўладиган радиоактив изотопдир.

Намуналардаги цезий-137 миқдори кам бўлса-да, нормал даражадан ошиб кетган — бир метр кубга 5 микробеккерелга яқин. Радиоактив изотоп 9-12 сентябр кунлари фақатгина Норвегия-Россия чегараси яқинидан топилган: бошқа радиацион кузатув постлари — Норвегия шимоли ва Лапландияда бундай ҳолат қайд этилмаган. Шунингдек, Россия томонидан олинган намуналарда ҳам цезий аниқлангани тўғрисида маълумотлар йўқ.

DSA’дагиларнинг таъкидлашича, цезий-137 нинг пайдо бўлиш манбаси номаълум. Баренц денгизида бир нечта атом музёрари, шунингдек, атом сувости кемалари фаолият юртимоқда — улар 16 сентябрдан «Океан-2024» ўқувларида иштирок этишни бошлаган. Шу билан бирга, норвегиялик экспертларнинг айтишича, цезий-137 ишлаб турган реактордан денгизга «оқиб кетган бўлиши» эҳтимоли кам.

Уларнинг фикрича, бу Россия томонидан «Буревестник» ядровий двигателга эга ракеталарининг яратилиши ёки синовдан ўтказилиши билан боғлиқ бўлиши мумкин. Уни учиришга мўлжалланган полигон Янги Ер архипелагида жойлашган бўлиб, СССР 1990 йилга қадар у ерда ядровий синовларни амалга оширган.