Шимолий Кореяга қочиб ўтган америкалик аскар шармандаларча армиядан ҳайдалгани маълум бўлди

Жанубий Кореядан КХДРга қочиб ўтган америкалик аскар Трэвис Кинг уйига қайтишдан олдин бир йил муддатга озодликдан маҳрум этилгани ва шармандаларча армиядан ҳайдалгани маълум бўлди, деб хабар беради BBC.

Оддий аскар Кинг 2021 йил январдан бери армияда хизмат қилиб келган ва бўлинмалар ротацияси доирасида Жанубий Кореяга юборилган. 2023 йил июлда АҚШ армияси Кингга нисбатан чегарани ноқонуний кесиб ўтиш бўйича 14 та айблов эълон қилганди. У айбловларнинг фақат бештаси, жумладан, дезертирлик ва ҳужум бўйича айбига иқрор бўлган.

Адвокатларнинг нашрга маълум қилишича, 24 ёшли аскар жазо муддатини ўтиб бўлиб, озодликка чиққан. Суд эшитуви давомида Кинг ҳарбий судяга АҚШ армиясидан «норозилиги» сабаб қочганини билдирган.

«Мен АҚШ армиясидан қочиб кетишни ва ҳеч қачон ортга қайтмасликни хоҳладим», — деган Кинг суд залида. Шунингдек, у ўзига руҳий саломатлигида муаммолар бўйича касаллик ташхиси қўйилганини маълум қилган.

Кингнинг адвокати Франклин Розенблатт баёнот бериб, ўз мижози содир бўлган воқеа бўйича барча айбловларни тан олишини билдирган ва Кинг «ҳаёти давомида кўплаб муаммоларга, жумладан, оғир тарбияда, криминал муҳитда» улғайганини қўшимча қилган.

«Мазкур омилларнинг барчаси у армияда дуч келган қийинчиликларни янада чуқурлаштириб юборган», — дейди Розенблатт.

Кинг КХДР билан чегарани кесиб ўтгунга қадар Жанубий Кореяда фуқароларга ҳужум уюштириш ва полиция машинасига оёғи билан шикаст етказишда айбланиб, қамоқда ўтирган.

Тревис 10 июлда — мамлакатнинг Пхенян билан чегарасини кесиб ўтишидан саккиз кун олдин озод қилинган. Кингни АҚШга олиб келиш бўйича музокаралар швециялик амалдорлар воситачилигида амалга оширилган бўлиб, натижада аскар Шимолий Кореянинг Хитой билан чегарасига етказилган.

Собиқ аскарнинг адвокатига кўра, унинг мижози озодликка чиққанига қарамай, «жамиятнинг салбий муносабати» ва Кинг қамоқда ўтказган муддат «у умрининг охиригача чидаши керак бўлган давомий жазонинг бир қисмидир».