«Hamster Kombat» ўйини токенини фақат Ўзбекистонда рухсат этилган криптобиржада сотиш мумкин

Истиқболли лойиҳалар миллий агентлиги (ИЛМА) «Hamster Kombat» ўйини ва унинг «HMSTR» крипто-активи савдоси билан боғлиқ масалага аниқлик киритди.

Қайд этилишича, «The Hamster Foundation» лойиҳаси ташкилотчилари «TON» экотизими доирасида «Hamster Kombat» ўйинининг HMSTR токени чиқарилишини эълон қилган. Ўзбекистонликлар ушбу турдаги ўйинлар учун листинг жараёнидан ўтган крипто-активларни қонуний равишда сотиб олиши ёки сотиши мумкинми, фуқаролар ушбу крипто-активлар билан қандай ва қаерда операцияларни амалга ошириши мумкинлиги ҳақида агентликка саволлар йўллаган.

ИЛМА берган изоҳга кўра, «HMSTR» токенларини фақат крипто-активлар айланмаси соҳасидаги хизмат кўрсатувчи миллий провайдерлар орқали, агар улар крипто-биржа котировка рўйхатига ёки крипто-дўконнинг савдо саватига киритилган бўлса, харид қилиш ёки сотиш мумкин бўлади.

Агентликнинг эслатишича, Ўзбекистон ҳудудида крипто-активнинг тури ёки номидан қатъи назар, крипто-активлар айланмаси соҳасидаги қонун ҳужжатларини бузганлик учун қонунчилик даражасида маъмурий ва жиноий жавобгарлик чоралари белгиланган.

ИЛМА ўзбекистонликларни ҳушёр бўлишга чақириб, лойиҳа бўйича норасмий манбалар орқали олинган маълумотларга, шунингдек, ушбу токенларни харид қилиш/сотиш бўйича ўз хизматини таклиф қилаётган шахсларга ишонмасликка чақирмоқда.