РФ 2025 йилда уруш учун рекорд даражадаги 13,5 трлн рубл ажратади

2025 йилда Россиянинг «Миллий мудофаа» банди бўйича бюджет харажатлари 13,5 триллион рублни ташкил этиши кутилмоқда, бу Россия Федерацияси ялпи ички маҳсулотининг 6,31 фоизига тенг, деб ёзади The Bell 2025-2027 йилларга мўлжалланган федерал бюджет лойиҳаси тушунтириш хатига таяниб. Россия ҳукумати томонидан тайёрланган ушбу қонун лойиҳаси 30 сентябр, душанба куни Россия Федерацияси Давлат думасига киритилган. The Bell ҳисоб-китобларига кўра, жами 2025 йилда мудофаа ва хавфсизлик Россия бюджети харажатларининг 41 фоизини ташкил қилади, у эса 41,5 триллион рублга тенг.

Шу билан бирга, янги бюджет лойиҳасида 2026-2027 йилларда Россия ҳарбий харажатлари камайишни бошлаши назарда тутилган. Шундай қилиб, 2026 йилда мудофаа харажатлари 12,8 триллион рублни, 2027 йилда эса 13,1 триллион рублни ташкил этиши прогноз қилинмоқда, дейилади тушунтириш хатида.

Аввалроқ Bloomberg манбаларга таяниб, келаси йили Россия мудофаа харажатларини чоракдан кўпроқ — 13,2 триллион рублгача оширишни режалаштираётгани ҳақида хабар берган эди. 2024 йилда Россия Федерациясининг ҳарбий харажатлари 10,7 триллион рублдан ошди, бу биринчи марта пенсия ва нафақаларни тўлашни ўз ичига олган «Ижтимоий сиёсат» банди бўйича харажатлардан ошиб кетди.

Путин РФ Хавфсизлик кенгаши таркибини 35 кишигача кенгайтирди

Россия президенти Владимир Путин РФ Хавфсизлик кенгаши аъзолари сонини 35 кишига етказди. Тегишли фармон 30 сентябр куни норматив-ҳуқуқий ҳужжатлар расмий нашри сайтида эълон қилинди. Хавфсизлик кенгашининг янги аъзолари бош вазирнинг биринчи ўринбосари Денис Мантуров ва Путиннинг собиқ қўриқчиси, энди эса унинг ёрдамчиси ва Россия Федерацияси Давлат кенгаши котиби Алексей Дюмин бўлди.

Бундан ташқари, Хавфсизлик кенгаши таркибига президентнинг Махсус дастурлари бош бошқармаси бошлиғи Александр Линец, шунингдек, Федерал тиббий-биология агентлиги раҳбари, собиқ соғлиқни сақлаш вазири Вероника Скворцова кирди. Шу билан бирга, сентябр ойида Федерация кенгаши раисининг биринчи ўринбосари лавозимини эгаллаган «Ягона Россия» партияси бош котиби вазифасини бажарувчи Владимир Якушев Хавфсизлик кенгаши таркибидан чиқарилди.

Россия Федерацияси Хавфсизлик кенгашининг раиси — Владимир Путин, унинг ўринбосари — Дмитрий Медведев. 2024 йилнинг май ойидан бери Хавфсизлик кенгаши котиби - Россиянинг собиқ мудофаа вазири Сергей Шойгу. Ундан аввалги котиб Николай Патрушев Путиннинг ёрдамчиси лавозимига тайинланган.