Ҳиндистон Олий суди қашшоқ оиладан чиққан талабанинг коллежга кириш орзусини рўёбга чиқарди

Ҳиндистон Олий суди коллеж пулини ўз вақтида тўлай олмаган йигит фойдасига қарор чиқарди, деб хабар беради BBC.

Қайд этилишича, 18 ёшли Атул Кумар июн ойида Ҳиндистондаги нуфузли технология коллежига ўқишга киришга ёрдам берадиган мураккаб имтиҳондан ўтганидан хабар топганида ҳайратга тушган. Аммо шундан кейин муаммолар бошланган: ўқишга қабул қилиниш учун онлайн равишда 17,5 минг рупий (281 доллар) тўлаш керак эди. Бу мамлакатнинг Уттар-Прадеш штатида яшовчи оиласи учун катта маблағ эди.

Йигитнинг отаси қарз олишга эришади, аммо Атулнинг айтишича, у онлайн тўловни амалга оширишга бир неча сония кеч қолади — бунга техник муаммолар ҳам қисман сабаб бўлган.

Оила таслим бўлмай, судга даъво киритади. Жорий ҳафта мамлакат Олий суди Ҳиндистон технология институтига (IIT) Атулни ўқишга қабул қилиш бўйича қарор чиқарди. Олий суд конституцияда белгилаб қўйилган фавқулодда ваколатидан фойдаланиб қарор қабул қилган ва ўз қарорини «биз бундай иқтидорли йигитнинг кетишига йўл қўя олмаймиз», дея изоҳлаган.

IIT Ҳиндистондаги етакчи технологик институт бўлиб, бутун мамлакат бўйлаб жойлашган 23 та коллежидаги 18 минг талаба ўрнига миллиондан ортиқ йигит-қизлар даъвогарлик қилади. Абитуриентлар имтиҳонларга тайёрланиш учун йиллаб репетиторлик марказларига қатнайди, ота-оналар ўз фарзандининг IIT’га ўқишга кирганини «муваффақият чиптаси» деб баҳолайди.

Атул билан боғлиқ воқеа ва унинг қийинчиликда улғайган ҳаёти Ҳиндистон газеталарининг асосий саҳифаларидан ўрин олди. Маълум бўлишича, Атул Ҳиндистондаги энг қуйи кастага киради. Отаси Ражендра Кумар турли оғир меҳнат билан шуғулланиб, кунига 5 долларга яқин пул ишлаб топади, онаси эса уйида гилам тўқийди.

Аммо Ражендра Кумарнинг сўзларига кўра, унинг учун фарзандлари таълимидан муҳимроқ нарса йўқ, бир сафар у ҳатто тўнғич ўғлининг ўқишига пул тўлаш учун уйини ҳам сотган. Атулнинг икки акаси коллежда муҳандислик бўйича, яна бири бўлса бакалавр даражаси учун таълим олмоқда.

Атул имтиҳонни топширганида, унинг отаси маҳаллий судхўрга мурожаат қилган. Аммо у тўловни амалга ошириш якунланишига икки соат қолганида пул бермайдиган бўлган. Шунда эркак дўстларидан ёрдам сўраган ва улар 14 минг рупий йиғиб берган. Ражендра Кумар қолган 3,5 мингни ўзи тўплаб келган маблағдан олган.

У Атул расмийлаштиришни якунлаш учун тизимга кирган вақтида пулни тўнғич ўғлининг банк ҳисоб рақамига ўтказган. Бироқ бу вақтга келиб белгиланган 180 сония вақт тугаб бораётган эди. Тўловни амалга ошириш вақтида портал кутилмаганда қотиб қолган ва Атул тўловни якунлашга улгурмаган. Юзага келган ҳолатдан шокка тушган оиланинг томоғидан бир кун давомида ҳеч нарса ўтмаган.

Атул тайёрланган марказ IIT Dhanbad’га мурожаат қилган, аммо уларнинг эътирози қаноатлантирилмаган. Ғазаб отига минган оила коллежнинг бир нечта раҳбарига электрон мактуб йўллаган ва судга даъво киритган — буларнинг барчаси самарасиз кетган.

Охирги йўл Олий судга мурожаат қилиш бўлган. 2021 йилда ҳам суд IIT Бомбейга ўқишга киришда худди шу каби муаммога дуч келган талаба фойдасига қарор чиқарган эди. Атул ва унинг оиласи ушбу талаба билан боғланиб, адвокати рақамини олган. Якунда суд қарори билан IIT Dhanbad Атул учун қўшимча жой ажратадиган бўлди.