РФ Запорижжя ва Миколайивга зарба берди: камида беш киши ҳалок бўлди

Запорижжяда РФ зарбасидан кейин портлаш юз берди, икки қаватли уй, ётоқхона ва автосалонга зарар етди, вайроналар тозаланмоқда, камида бир киши ҳалок бўлди. Миколайив области расмийлари тўрт қурбон ҳақида гапирмоқда.

Фото: Telegram / ivan_fedorov_zp

11 ноябр, душанбага ўтар кечаси Россия кучлари Украинанинг қатор ҳудудларига ҳаво зарбалари берди. Запорижжя ва Миколайив расмийлари ва фавқулодда хизматлари эрталаб зарбалар ҳақида хабар берди.

Украина Фавқулодда вазиятлар давлат хизмати (ФВДХ) маълумотларига кўра, Запорижжя области марказига камида учта авиазарба берилган. Шу билан бирга, УҚК Ҳаво кучлари Россия Федерацияси томонидан Запорижжяга бошқариладиган ҳаво бомбалари учирилганини эълон қилди.

Ҳужумлар натижасида портлаш тўлқини икки қаватли турар жой биносини қисман вайрон қилган, ётоқхона ва автосалон биносига зарар етказган, деб хабар қилди ФВДХ. «Дастлабки маълумотларга кўра, ҳужум оқибатида эркак киши ҳалок бўлди. 9 киши жароҳатлари туфайли шифокорларга тиббий ёрдам сўраб мурожаат қилди. Жабрланганлар орасида 15 ёшли қиз ҳамда 4 ва 17 ёшли икки нафар ўғил бола ҳам бор. Жабрланганлар сони аниқлаштирилмоқда», — дейилади идора хабарида.

Миколайив мэри: Ҳужумда дронлардан ҳам фойдаланилди

Миколайив области ҳарбий маъмурияти раҳбари Виталий Ким ҳам Россия тунги ҳужумлари қурбонлари ҳақида маълум қилди. Унинг сўзларига кўра, гап камида тўрт кишининг ўлими ҳақида кетмоқда. Амалдор тафсилотларни келтирмади, аммо Миколайив мэри Александр Сенкевичнинг сўзларига кўра, ҳужумда Россия Федерацияси Украинага қарши уруш пайтида кенг миқёсда фойдаланаётган УУА ҳам қўлланган.

Украина нашрлари УҚК Ҳаво кучларига таяниб, 11 ноябр эрта тонгда Россия Федерацияси Украинага ҳужумларини давом эттирганини таъкидлади. Мониторинг каналлари маълумотларига кўра, Россиянинг саккизта Ту-95МС стратегик бомбардимончи самолётлари учириш позицияларига йўл олган. Кузатувчилар ракеталар учирилишига ёлғондан тайёргарлик кўрилганини ҳам истисно этмаяпти.

#РФ #Запорижжя