Amazon видео ва суратларни қайта ишлашга қодир сунъий интеллект моделини тақдим этади

Amazon матн, сурат ва видео билан ишлашга қодир ўзининг генератив сунъий интеллект тизимини ишлаб чиқди, деб хабар беради The Information.

Фото: Reuters

Қайд этилишича, ушбу янгилик компанияга Anthropic стартапи маҳсулотларига бўлган боғлиқлигини камайтиришга хизмат қилади. Anthropic’нинг Claude чатботи Amazon Web Services платформасида анча машҳур илова ҳисобланади.

Olympus кодли номи остидаги янги катта тил модели суратлар ва видеодаги объектларни танишга қодир, масалан, у матнли сўров бўйича баскетбол ўйини видеосидаги керакли лаҳзани топишга ёрдам беради.

Бундан олдин Amazon OpenAI’нинг асосий рақобатчиси бўлган Anthropic компаниясига яна 4 миллиард доллар сармоя киритиши маълум бўлганди. Сентябр ойида Amazon ушбу стартапга сармоя йўналтирди ва генератив сунъий интеллект технологияси ортидан пул ишлаш имкониятини қўлга киритди. Olympus булутли платформалар мижозлари учун кейинги ҳафта ўтказиладиган AWS re:Invent конференциясида тақдим этилиши мумкин.

«Amazon ўз хатти-ҳаракатлари орқали Google, Microsoft ва OpenAI генератив сунъий интеллект соҳасида шубҳасиз етакчи деган фикрга барҳам бермоқчи», — дейилади хабарда.

Аввалроқ Amazonʼнинг Япониядаги штаб-квартирасида тинтув ўтказилгани тўғрисида хабар берилганди. Amazon Japan антимонополия қонунчилигини бузишда гумонланмоқда. Компания чакана савдо билан шуғулланувчиларни ўз товарлари нархини арзон кўрсатишга мажбурлаб келган бўлиши мумкин.