Лукашенко: Беларусда ўнлаб ядровий каллаклар бор

Беларус президенти Александр Лукашенко мамлакатга «ўндан ортиқ» ядровий каллаклар олиб келинганини маълум қилди. У бошқа мамлакатларни давлат чегараси бузилгудек бўлса, зудлик билан жавоб қайтариши ҳақида огоҳлантирганини қўшимча қилди.

«Мен бу ерга ядровий каллакларни олиб келдим. Улар ўндан ортиқ. Кўпчилик «бу ҳазил, ҳеч ким ҳеч нарса олиб келмади», деб ёзмоқда. Олиб келинди. Улар [мухолифлар] буни ҳазил деб айтаётгани, кўздан қочирганликларини англатади. Улар ҳатто қандай олиб келинганини ҳам пайқамай қолишди», — дейди Беларус президенти.

Александр Лукашенко ядровий қуролни қўллашни катта масъулият деб атади. «Мен барча душманларим, «дўстларим» ва рақибларимни огоҳлантирдим: давлат чегараси чизиғига қадам қўйишингиз билан шу ондаёқ жавоб бўлади. Мен ядровий қурол ёки бошқа нарсага қараб ўтирмайман», — дея қўшимча қилади у.

Лукашенконинг қайд этишича, Беларус қўлга киритган ядровий каллаклар «Орешник» баллистик ракетасидан беш баробар кучли. Шунингдек, у «Орешник»ни учиришга мўлжалланган қурилмалар Беларусда ишлаб чиқарилганини маълум қилди.

2024 йил мартда Москва ва Минск Россия тактик қуролларини Беларусга жойлаштириш бўйича келишиб олганди. Апрелда Александр Лукашенко Россия ҳукумати мамлакатга «ўнлаб замонавий ядровий каллакларни» қайтариш бўйича қарор қабул қилганини айтган эди.

Аввалроқ Путин ва Лукашенко хавфсизлик кафолатлари тўғрисидаги шартномани имзолаган эди. Беларус пойтахтида имзоланган ҳужжат иттифоқ давлатларини «барча воситалар», жумладан, ядровий қуролдан фойдаланиб бўлса ҳам ҳимоя қилишни назарда тутади.