Бундестаг депутати канцлер Шолц Путин билан учрашгани Москвага боришини маълум қилди. Германия ҳукумати буни ёлғон деб атади

Германия ҳукумати Христиан-демократлар иттифоқидан сайланган бундестаг депутати Родерих Кизеветтерга нисбатан «юридик чора» тайёрлайди. У мамлакат канцлери Олаф Шолц Владимир Путин билан учрашиш учун Москвага ташриф буюришни режалаштираётгани тўғрисида хабар тарқатган.

Кизеветтер 4 январ куни Х ижтимоий тармоғидаги саҳифасига «канцлер Шолц Москвага бориши ёки 23 февралгача Путин билан учрашишининг белгилари тобора кўпайгани» ҳақида ёзди. Шу куни немис парламентида муддатидан олдин сайловлар ўтказилиши керак. Депутат буни «сайловолди кампанияси сюрпризи» деб атади. Шу билан бирга, у ўзи ёзган хабар манбасини келтирмаган. Кизеветтернинг таъкидлашича, март ойида Россия президенти АҚШнинг сайланган президенти Доналд Трамп билан учрашади.

Путин билан учрашув режаси борлигини Шолцнинг ўзи рад этди. У Кизеветтер баёнотини ёлғон деб атади.

Германия ҳукуматининг расмий вакили Штеффан Хебештрайт ҳам депутатнинг сўзлари ёлғон эканини маълум қилди. «Бундай сафар режалаштирилмаяпти ва ҳеч қандай маънога эга эмас. Ҳозирда бу бўйича [Кизеветтернинг баёноти юзасидан] юридик чоралар кўрилмоқда», — дейди у.

Россия президентининг матбуот котиби Дмитрий Песков айни вақтда Путиннинг Шолц ва Трамп билан учрашиш режаси йўқлигини маълум қилди.

Декабр ойида Spiegel Шолц яқин кунларда Украинада урушни тўхтатиш учун Путин билан музокаралар ўтказиш мақсадида Москвага ташриф буюришни режалаштираётгани ҳақида ёзганди. Шу билан бирга нашрнинг Христиан-демократлар иттифоқидаги суҳбатдоши ушбу маълумотни «миш-миш» деб атаган.

2024 йил 15 ноябр куни Шолц ва Путин икки йил ичида биринчи марта телефон орқали мулоқот қилганди. Суҳбат давомида Германия канцлери Путинни Россиянинг Украинага қарши босқинини тўхтатишга ва РФ қўшинларини унинг ҳудудидан олиб чиқиб кетишга чақирган.