Россиядан Хитойга нефт етказиб бериш нархи cанкциялардан кейин уч баравар қимматлашди

АҚШнинг янги санкциялари киритилгунга қадар Россиядан Хитойга нефт ташиш нархи 1,5 миллион долларни ташкил этган бўлса, бир неча кундан кейин у 5-5,5 миллион долларгача кўтарилди, деб ёзади Bloomberg. Трейдерлар ставкалар янада ошишини кутишмоқда.

Фото: Karachi Port Trust/AP/picture alliance

Вашингтон нефт сектори ва Россия соядаги флотига қарши янги санкциялар жорий қилганидан кейин Россиядан Хитойга нефтни ташиш нархи кескин ошди. Россиянинг ESPO нефтини Узоқ Шарқдаги Козмино портидан Хитойга ташиш учун юк нархи уч баробардан кўпроққа ошди – санкциялар жорий этилгунга қадар 1,5 миллион доллардан 13 январда 5-5,5 миллион долларгача етди, деб хабар берди Bloomberg 16 январ, пайшанба куни трейдерларга таяниб.

Трейдерлар Россия нефти учун юк ставкаларининг янада ўсишини кутишмоқда. Козмино-Хитой йўналиши бўйлаб ҳаракатланаётган танкерларнинг аксарияти Афрамакс типидаги кемалар бўлиб, улар 750 минг баррелгача нефтни ташишга қодир, дея қайд этади агентлик.

Россия соядаги флоти кемаларининг 10 фоизи денгизда қолиб кетган

Аввалроқ АҚШнинг янги санкциялари киритилгач, Россия соядаги флотининг 3,5 миллиард доллардан ортиқ нефт ташиётган танкерларининг 10 фоизи денгизда қолиб кетгани хабар қилинганди. Бу кемалар сўнгги икки ярим ҳафта ичида Россиядан жўнатилган нефтни тушира олмаяпти. Reuters маълумотларига кўра, Хитой, Сингапур ва Россия қирғоқлари яқинида Россия нефти бўлган камида 65 танкер сузиб юрибди.

10 январ куни Қўшма Штатлар Россияга нефт экспорт қилувчи иккита йирик компания — «Газпром нефть» ва «Сургутнефтегаз»га қарши блокловчи санкциялар киритди. Уларга, ўнлаб бошқа компаниялар қатори, энди доллар ёки Америка молия тизимидан фойдаланган ҳолда молиявий операцияларни амалга ошириш тақиқланган. Россиянинг энг йирик юк ташиш компанияси "Совкомфлот" ҳам санкциялар остида қолди.

Ҳозирда турли мамлакатлар байроқлари остидаги 183 та танкер чекловлар остида. Улар Россиянинг Украинага қарши давом этаётган уруши туфайли Ғарб томонидан киритилган санкцияларни бузган ҳолда Россия нефти ва нефт маҳсулотларини ташиётгани айтилмоқда. Таҳлилчиларнинг фикрича, дунёдаги нефт танкерлари паркининг тахминан 10 фоизи аллақачон санкциялар остида.