Жаҳон | 11:48 / 30.01.2025
1433
3 дақиқада ўқилади

Бундестаг миграцияни чеклаш ташаббусини маъқуллади

Германия қонун чиқарувчилари мухолифатдаги консерваторларнинг ноқонуний муҳожирларга қарши радикал чоралар тўғрисидаги резолюциясини уч овоз фарқи билан маъқуллади.

Фото: Michael Kappeler/dpa/picture alliance

Германия Бундестагидаги энг йирик мухолифат фракциясининг иммиграция қонунчилигини тубдан қатъийлаштириш тўғрисидаги резолюция лойиҳаси кўпчилик депутатлар томонидан қўллаб-қувватланди. 29 январ, чоршанба куни қизғин баҳс-мунозаралардан сўнг ХДИ/ХСИ блоки таклиф қилган беш банддан иборат ҳужжат маъқулланди, жумладан, доимий чегара назоратини жорий этиш, чегарада бошпана сўраганларни рад этиш ва ҳокимият томонидан мамлакатни тарк этишга буйруқ берилган чет элликларни ҳибсга олиш имконияти шуларга киради.

Ташаббусни консерваторлар, либераллар ва ўнг популистлар қўллаб-қувватлади

Такрорий овоз бериш жараёнида 348 депутат резолюция учун овоз берди, 345 нафари қарши чиқди, 10 нафари эса бетараф қолди. Ҳукмрон Германия Социал-демократик партияси (ГСДП) ва "Алянс-90"/"Яшиллар", шунингдек, Сўл партия бунга қарши чиқди. Сўл популист "Сара Вагенкнехт алянси" овоз беришда бетараф қолишини эълон қилди. Овоз беришдан олдин Германия канцлери Олаф Шолц мухолифат таклиф қилган чораларни маъқулламасликка чақирди.

Шу билан бирга, Reuters қайд этганидек, қабул қилинган резолюция федерал ҳукумат ва умуман маҳаллий органлар учун мажбурий эмас.

ХДИ/ХСИнинг ҳуқуқни муҳофаза қилиш органлари учун қўшимча ваколатларни тақдим этиши керак бўлган иккинчи ташаббуси қўллаб-қувватланмади. Унга 190 депутат овоз берди, 509 нафари қарши, 3 нафари бетараф қолди. Мунозара давомида ГСДП, "Яшиллар", Сўл партия, СВА, ГуМ ва ЭрДП аъзолари ХДИ/ХСИ таклифига қарши чиқишди, дея хабар беради dpa.

Германия 43 000 дан ортиқ кишига чегарада давлатга киришга рухсат бермади

Германия Ички ишлар вазирлигига кўра, мамлакат чегараларида полиция текширувлари қайтганидан кейин ўн минглаб одамларнинг Германияга киришига тўсиқ пайдо бўлди. Назорат 2023 йил октябр ойида жорий этилганидан бери – аввалига тўртта давлат билан чегараларда ва 2024 йилнинг кузидан бошлаб Германиянинг барча чегараларида – 43,5 минг кишига киришга рухсат берилмаган, деди департамент вакили 27 январ куни Берлинда журналистларга.

«Бу ноқонуний киришлар катта қисмининг рад этиш орқали олди олинганлигини англатади», — дея унинг сўзларини келтиради Reuters. Ички ишлар вазирлиги вакилининг таъкидлашича, «мунозараларда кўпинча бунга эътибор берилмайди». Бироқ, федерал ҳукумат нуқтайи назаридан, «бутунлай тартибсиз» чиқариб юбориш мумкин эмас.

Мавзуга оид