Фарғонада компютер клуби ходимларини калтаклаганлар қамоққа олинди

Фарғона шаҳридаги “Verona” компютер клубида жанжал кўтарган шахслар жавобгарликка тортилди. Ҳолат юзасидан Фарғона вилояти ИИБ ахборот хизмати муносабат билдирди. 

Маълум қилинишича, жорий йилнинг 21 феврал куни Фарғона шаҳар Офтоб кўчасида жойлашган компютер ўйинлари клубида етти нафар танишлар ўзаро бақир-чақир қилиб компютер ўйнашган. Клуб иш бошқарувчиси Ф.Худойназаров томонидан уларга эътироз билдирилган. Оқибатда ўзаро келишмовчилик сабабли фуқаро О.Валломов унинг юз қисмига уриб юборган ва жанжалга унинг шериклари ҳам қўшилишган.

Ҳозирда мазкур ҳолат юзасидан Жиноят кодексининг 277-моддаси 3-қисми “г” банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб, безорилик қилиш) билан жиноят иши қўзғатилган. Гумонланувчилар О.Валломов, М.Қодиров ҳамда Н.Маҳмуджоновга нисбатан қамоққа олиш тарзидаги эҳтиёт чораси қўлланган.

Шунигдек, уларнинг яна уч нафар шеригига нисбатан маъмурий тартибда баённома расмийлаштирилган.

“Мазкур ҳолат вилоят ИИБ томонидан назоратга олинган. Якунига кўра қонун устуворлиги, жазо муқаррарлиги таъминланади”, дейилади муносабатда.

Kun.uz олдинроқ Отабек Валломов ва унинг шериклари компютер клуби ходимларини калтаклагани ҳақида хабар берганди. Kun.uzʼга келиб тушган видео-далилларда кўринишича, клубда компютер ўйнаб ўтирган йигитлар дастлаб шовқин солиб, бошқаларга халақит қилишган. Шундан сўнг компютер клуби ходимлари келиб, шовқин солмасликни сўраган. Шовқин тўхтамагач, йигитларни компютерни ўчириб қўйиш билан огоҳлантиришган. Шундан сўнг гап талашишлар муштлашувга айланган.

Клубдаги шовқин-сурон ва фуқароларни калтаклашни бошлаган йигит ўзининг “Отабек Валломов” эканини айтиб, керак бўлса клубни сотиб олишини билдирган. У “хоҳлаган одамингни бошлаб кел”, деб бақирган.