OpenAI янги сунъий интеллект GPT-4.5 моделини тақдим этди. У кодларни яхшироқ ёзади

Американинг OpenAI компанияси сунъий интеллектнинг янги GPT-4.5 моделини тақдим этди. Бу ҳақда компания блогида маълум қилинди.

OpenAI’нинг қайд этишича, янги версия фойдаланувчининг нозик ишораларини ҳам яхши тушунади ҳамда уларга жавоб қайтаради — у ёзиш ёки дастурлашда фойдали бўлиши мумкин. Компаниядагилар GPT-4.5 олдинги моделдан камроқ хато қилишини кутмоқда.

Компания ичида Orion деб аталаётган моделнинг дастлабки версиясидан ҳозирда дастурий таъминот устида иш олиб борган гуруҳ ва ChaGPT Pro обуначилари фойдалана олади.

OpenAI’нинг тадқиқотлар бўйича вице-президенти Ник Райдернинг маълум қилишича, янги моделнинг имкониятлари 2023 йил бошида GPT-3.5ʼдан GPT-4ʼга ўтилганда бўлгани каби жорий топ моделга нисбатан яхшиланиши кутилмоқда.

Bloomberg агентлиги 2024 йилда OpenAI компанияси Orion моделини ишлаб чиқишда қийинчиликларга дуч келгани ҳақида ёзганди. Манбаларнинг сўзларига кўра, Orion ўзига ўргатилмаган дастурлаш машқларини уддалай олмаган. Шунингдек, компания янада такомиллашган сунъий интеллект тизимларини яратишда зарур бўладиган янги, фойдаланилмаган манбаларни қидиришда қийинчиликка учраган.

Аввалроқ OpenAI сунъий интеллект моделларини ўқитиш сиёсатига ўзгартиришлар киритганди. Бу мунозарали мавзуларга янада холис ёндашувни таъминлаш мақсадида амалга оширилган. Энди ChatGPT илгари “тақиқланган” саволларни ҳам муҳокама қила олади.