Сэм Алтманнинг уйига “Молотов коктейли” улоқтирилди

Йигирма ёшли эркак OpenAI ҳаммуассиси Сэм Алтманнинг уйига ёнилғи аралашмаси солинган шишани отган ва компания штаб-квартирасини ёқиб юбориш билан таҳдид қилган. Вилланинг дарвозаси ёнган, аммо ҳеч ким жабрланмаган. Ҳужум қилган шахс қўлга олинган.

Фото: AP

Жума, 10 апрел куни, Сан-Францискодаги OpenAI ҳаммуассиси ва бош директори Сэм Алтманнинг вилласига ҳужум қилинди: маҳаллий полиция маълумотига кўра, 20 ёшли эркак уйга ёнилғи аралашмаси солинган шишани отган, оқибатда дарвоза ёнган, аммо одамлардан ҳеч ким жабр кўрмаган.

Ҳужум қилган шахс воқеа жойидан қочиб кетган, аммо кейинроқ қўлга олинган. У, шунингдек, компаниянинг Сан-Францискодаги бош офисига ўт қўйиш билан ҳам таҳдид қилган.

San Francisco Chronicle маҳаллий нашри маълумотига кўра, гумонланувчи Алехандро Даниэл Морено-Гама исмли шахс бўлиб, у ҳибсга олинган.

Полиция ҳужум сабаби ҳозирча ноаниқ эканини таъкидлади. Шу билан бирга, кейинги вақтларда сунъий интеллект асосида ишловчи ChatGPT чат-ботини яратгани билан танилган OpenAI компанияси ва унинг раҳбари Сэм Алтман сунъий интеллектга қарши чиққан норозиларнинг нишонларидан бирига айланган. Улар бу технологияни инсоният учун таҳдид деб ҳисоблайди.