Х ижтимоий тармоғи киберҳужумга учради. Фойдаланувчилар бир неча соат узилишлардан шикоят қилди

Х ижтимоий тармоғига (собиқ Twitter) «кенг кўламли киберҳужум» уюштирилди. Бу ҳақда тармоққа эгалик қилувчи Илон Маск маълум қилди.

«Бизга ҳар куни ҳужум қилишади, аммо бу сафар катта миқдорда ресурслар ишга солинди. Бунга мувофиқлаштирилган катта гуруҳ ва/ёки давлат жалб этилган. Кузатамиз», — деб ёзади Маск.

Downdetector сайти маълумотларига кўра, 10 март куни Х ижтимоий тармоғи фаолиятида учта глобал узилиш содир бўлган. Фойдаланувчилар бир неча соат сайт ва иловада муаммолар кузатилганини ёзмоқда.

Newsweek’нинг ёзишича, киберҳужум учун масъулиятни Dark Storm Team ҳакерлар гуруҳи ўз зиммасига олган.

Dark Storm Team 2023 йилда ташкил этилган бўлиб, юқори даражадаги киберҳужумларни уюштириш билан шуғулланиб келади. Ҳакерлар гуруҳи Фаластин тарафдори экани ва НАТО давлатлари, Исроил ҳамда Исроилни қўллаб-қувватловчи давлатларга ҳужум қилиши билан ажралиб туради.