Бўстонлиқда 20 сотих ерни 230 минг долларга сотишга уринган шахслар ушланди

Тошкент вилоятининг Бўстонлиқ ва Тошкент шаҳрининг Янгиҳаёт туманлари ҳудудидан пул эвазига ер майдонлари олиб беришни ваъда қилган шахслар ушланди, деб хабар беради Бош прокуратура ҳузуридаги департамент.

Қайд этилишича, департаментнинг Бўстонлиқ тумани бўлими томонидан бошқа ҳуқуқни муҳофаза қилувчи орган ходимлари билан ҳамкорликда тезкор тадбир ўтказилган. Тадбирда А.А., Р.А. ва И.С. (муқаддам судланган) исмли шахслар ўзаро тил бириктириб, фуқаро Х.А.га тумандаги “Хўжакент” МФЙ ҳудудидан 20 сотих ер майдони ҳужжатларини расмийлаштириб, олиб бериш эвазига 230 минг АҚШ долларини олган вақтида ашёвий далиллар билан ушланган.

Шу каби, департаментнинг Янгиҳаёт тумани бўлими ва бошқа ҳуқуқни муҳофаза қилувчи орган ходимлари ҳамкорлигида ҳам тезкор тадбир ўтказилган. Унда С.И. исмли шахс фуқаро М.О.нинг ишончига кириб, унга танишлари ёрдамида “Янги Гулзор” МФЙ ҳудудидаги 18 сотих ер майдонининг 200 минг доллар эвазига эгалик ҳуқуқини берувчи ҳужжатларини расмийлаштириб беришни ваъда қилгани аниқланган. У олдиндан 20 минг долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Бўстонлиқ туманидаги 72,6 сотих нотурар ер майдонини 1 млн долларга сотмоқчи бўлган шахс қўлга олингани тўғрисида хабар берилганди.