АҚШ ички хавфсизлик департаменти раҳбари Кристи Ноэм 26 март куни Салвадорга ташрифи вақтида дунёдаги энг катта қамоқхоналардан бири – Cecot’га борди. Яқинда Америка ҳукумати Венесуэланинг жиноий гуруҳларга алоқадорликда айбланган 238 нафар фуқаросини шу ерга юборганди.

Ноэм ижтимоий тармоқлардаги видеомурожаатида «Америкадаги террорчиларни бу ерга олиб келиб, панжара ортига қамаб қўйгани» учун Салвадор ҳукуматига миннатдорчилик билдирган .

Ушбу видеода у панжарали камера фонида гапирган, унинг ортида Салвадорда MS-13 ва «Баррио-18» номлари билан машҳур жиноий тўдаларнинг қамалган аъзолари турган.

«Мен Салвадор президентига жиноятчиларни ушбу қамоқхонага жойлаштиришда АҚШ билан ҳамкорлик қилгани учун миннатдорчилик билдираман.

Аввало, АҚШга ноқонуний келманг. Сиз чиқариб юбориласиз ва жиноий жавобгарликка тортиласиз. Шуни билиб қўйингки, бу қамоқхона Америка халқига қарши жиноят содир этганингизда қўллашимиз мумкин бўлган воситалардан биридир», – деган Кристи Ноэм.

«Президент Трамп ва мендан ноқонуний жиноятчи мигрантларга аниқ хабарим бор: ҲОЗИРОҚ КЕТИНГ! Агар кетмасангиз, биз сизни таъқиб қиламиз, қамаймиз ва сиз Салвадордаги ушбу қамоқхонага тушишингиз мумкин», – дея ёзган Ноэм X'даги саҳифасида.

АҚШ ички хавфсизлик вазирининг Салвадорга сафари судлар венесуэлаликларни чиқариб юбориш қарорини ноқонуний деб топганига қарамай, АҚШ президенти Доналд Трамп маъмурияти миграция сиёсатидан воз кечмоқчи эмаслигидан далолат беради, дейилади BBC шарҳида.

Ноэм Салвадорга ташрифи чоғида Трампнинг иттифоқчиси, Салвадордаги «Терроризмга қарши кураш маркази» (Cecot) деб номланган ушбу мегақамоқхонани қурган президент Наиб Букеле билан учрашишни режалаштирмоқда. Салвадор ҳукумати у ерга 40 минггача маҳбусни жойлаштириш мумкинлигини билдирган.