Еврокомиссия сунъий интеллект ва киберхавфсизликка 1,3 млрд евро ажратади

Маблағлар, хусусан, бизнес ва давлат сектори учун генератив сунъий интеллект моделларини ишлаб чиқадиган «СИ фабрикалари»га йўналтирилади.

Фото: Getty images

Еврокомиссия Европа келажаги ва технологик суверенитети учун стратегик аҳамиятга эга бўлган муҳим технологияларни жорий этишга 1,3 миллиард евро ажратилишини эълон қилди.

Мазкур инвестициялар 2025–2027 йилларга мўлжалланган «Рақамли Европа» (DIGITAL) дастури доирасида амалга оширилади. Дастур сунъий интеллектни (СИ) кенг жорий этиш, кибербарқарорлик ва рақамли кўникмаларни ривожлантиришга йўналтирилган.

Қайд этилишича, маблағлар, хусусан, бизнес ва давлат сектори учун генератив сунъий интеллект моделларини ишлаб чиқадиган «СИ фабрикалари» ташаббусини рўёбга чиқариш бўйича муҳим чораларга йўналтирилади.

Еврокомиссия маблағлари, шунингдек, Европа рақамли инновациялар марказларини қўллаб-қувватлашга, шифохоналар ва сувости кабеллари каби муҳим инфратузилмалар киберхавфсизлигини кучайтиришга ҳамда ЕИдаги ўқув муассасаларининг рақамли кўникмалар бўйича салоҳиятини оширишга сарфланади.

DIGITAL дастурида иштирок этиш учун лойиҳалар танлови 2025 йил апрел ойида эълон қилиниши режалаштирилган.