Парламентлараро иттифоқ бош котиби «Дўстлик» ордени билан тақдирланди

Парламентлараро иттифоқ бош котиби Мартин Пуквареке Чунгонг Ўзбекистоннинг «Дўстлик» ордени билан мукофотланди. Бу ҳақда президент фармони эълон қилинди.

«Ўзбекистон Республикаси ва Парламентлараро иттифоқ ўртасидаги ҳар томонлама ҳамкорликни изчил ривожлантириш ва чуқурлаштириш борасидаги кўп йиллик самарали фаолияти, ижтимоий-иқтисодий, маданий-гуманитар соҳалардаги устувор қўшма дастур ва лойиҳаларни амалга ошириш, парламент дипломатияси ҳамда минтақалараро алоқаларни, очиқ ва конструктив сиёсий мулоқотни илгари суришга бевосита қўшган катта ҳиссаси, шунингдек, мамлакатимизнинг халқаро нуфузини дунё миқёсида кўтаришдаги амалий саъй-ҳаракатлари учун Парламентлараро иттифоқ Бош котиби Мартин Пуквареке Чунгонг Ўзбекистон Республикасининг «Дўстлик» ордени билан мукофотлансин», дейилади фармонда.

Мартин Пуквареке Чунгонг — камерунлик сиёсатчи ва дипломат бўлиб, 2014 йил 1 июлдан буён Халқаро парламентлараро иттифоқ (ХПИ) бош котиби лавозимини эгаллаб келмоқда.

Президент Шавкат Мирзиёев 7 апрель куни ушбу нуфузли тузилма раиси Тулия Эксон ва бош котиби Мартин Чунгонг делегациясини қабул қилди. Учрашув якунида Ўзбекистон раҳбари ҳамкорликни ривожлантириш ва парламент дипломатиясини самарали илгари суришга қўшган катта ҳиссаси учун Парламентлараро иттифоқ бош котиби Мартин Чунгонгни «Дўстлик» ордени билан тақдирлади.

Ўзбекистон 2017 йилда ХПИ фаолиятидаги иштирокини қайта тиклади ва бугунги кунда унинг ижро этувчи тузилмаларида тўлақонли қатнашмоқда.