Германия: Россия музокаралардан олдин сулҳга рози бўлиши керак

Германия канцлери идораси раҳбарининг фикрича, Россия Украинада тинчлик музокаралари бошланишидан олдин 30 кунлик оташкесимга рози бўлиши керак.

Торстен Фрай Фото: Annegret Hilse/REUTERS

Германия ҳукумати Украинадаги урушни тугатиш учун тинчлик музокаралари бошланишидан олдин Россия 30 кунлик оташкесимга рози бўлиши кераклигини таъкидламоқда. Бу позицияни федерал канцлер идораси раҳбари Торстен Фрай 11 май, якшанба куни ARD телеканалидаги Caren Miosga дастурида айтиб ўтди.

«Бу кетма-кетлик шундай бўлиши керак: биринчи навбатда ўт очишни тўхтатиш, кейин музокаралар — буни соғлом фикр талаб қилади», деди Фрай.

Германия расмийсига кўра, Россия президенти Владимир Путин ўзи эълон қилган уч кунлик ўт очишни тўхтатиш режимига амал қилмаган – ракета ҳужумлари ҳатто кучайган.

«Шунинг учун бизга энди бундай музокаралар нафақат бўлиб ўтиши, балки муваффақиятли бўлиши учун ҳақиқий истак борлигини кўрсатувчи ишончли белги керак», — дея қўшимча қилди Христиан-демократик иттифоқ сиёсатчиси.