Оқ уй 36 давлат фуқароларининг АҚШга киришини тақиқлаш масаласини кўриб чиқмоқда

Бу жумладан, фуқаролари АҚШдаги террорчилик ҳаракатларида ёки «антисемит ва антиамерика ҳаракатларида» иштирок этган давлатлар ҳам, дея маълум қилди АҚШ Давлат департаменти.

Фото: Carlos Moreno/Anadolu/picture alliance

Доналд Трамп маъмурияти фуқаролари АҚШга кириши тўлиқ ёки қисман тақиқланган давлатлар рўйхатини сезиларли даражада кенгайтириш имкониятини кўриб чиқмоқда. Бу ҳақда 15 июн, якшанба куни АҚШ Давлат департаментининг давлат котиби Марко Рубио имзолаган ички дипломатик телеграмма матнига таяниб Reuters агентлиги хабар берди.

Телеграммада айтилишича, агар 60 кун ичида Вашингтон хавотирлари сабабларини бартараф қилмаса, 36 «ташвишга сабаб бўлувчи» давлат чекловларга дучор бўлиши мумкин. Хусусан, айрим мамлакатлар фуқаролари АҚШдаги террорчилик ҳаракатларида ёки «антисемит ва антиамерика ҳаракатларида» қатнашган», дея маълум қилди АҚШ Давлат департаменти.

Рўйхатдаги бошқа давлатлар АҚШ маъмурияти хоҳлаганидек ўз фуқароларини АҚШдан чиқариб юборишга ёрдам бермаган ёки «ишончли шахсни тасдиқловчи ҳужжатларни бериш учун ваколатли ёки ҳамкорлик қилувчи ҳукуматга эга эмас», дея таъкидлаган идора. Яна бошқа баъзи давлатлар томонидан берилган паспортлар Вашингтон томонидан «шубҳали» деб баҳоланади.

Фуқаролари икки ойдан сўнг АҚШга кириши тўлиқ ёки қисман тақиқланиши мумкин бўлган 36 та давлат: Ангола, Антигуа ва Барбуда, Бенин, Буркина-Фасо, Бутан, Вануату, Габон, Гамбия, Гана, Конго Демократик Республикаси, Жибути, Доминика, Миср, Замбия, Зимбабве, Кабо-Верде, Камбожа, Камерун, Кот-д'Ивуар, Қирғизистон, Либерия, Мавритания, Малави, Нигер, Нигерия, Сан-Томе ва Принсипи, Сенегал, Сент-Киттс ва Невис, Сент-Люсия, Сурия, Танзания, Тонга, Тувалу, Уганда, Эфиопия ва Жанубий Судан.

Қирғизистон Ташқи ишлар вазирлиги АҚШ элчихонаси консулидан изоҳ сўраган.

#АҚШ #миграция