ЕИ кенгаши Россияга қарши 18-санкция пакетини қабул қила олмади

Европа Иттифоқи Украинага қарши уруши учун Россияга қарши 18-санкция пакетини қабул қила олмади. 15 июл, сешанба куни бўлиб ўтган Европа Иттифоқи ташқи ишлар кенгаши йиғилишида Словакия пакетга яна вето қўйди.

«Бугун биз бу келишувга эриша олмаганимиздан жуда хафаман. Айтишим керакки, биз бунга жуда яқин эдик», деди Брюсселдаги якуний матбуот анжуманида Европа дипломатияси раҳбари Кая Каллас.

Братислава 18-санкция пакетини мазмуни туфайли эмас, балки Европа Иттифоқининг Россия энергия ташувчиларидан воз кечиш RePowerEU режаси бўйича имтиёзларга эга бўлиш мақсадида блокламоқда. Словакия ҳукумати ушбу режани блоклай олмайди, чунки уни жорий қилиш бир овоздан қарорни талаб қилмайди.

Калласнинг сўзларига кўра, Еврокомиссия Братиславага сўраганини берган. «Энди тўп Словакия томонида ва биз бу келишувни якунлашимиз керак», — дея қўшимча қилди у ва бу 16 июлда содир бўлишига умид билдирди.

Братислава билан мунозара техник даражада давом этади. Полша ташқи ишлар вазири Радослав Сикорский ҳамкасблари билан учрашувдан сўнг бир неча соат ичида, яъни бугун келишувга эришиш мумкинлигини тахмин қилди. Бир қатор Европа Иттифоқи давлатлари, жумладан Германия, Швеция ва Нидерландия ташқи ишлар вазирлари 18-санкция пакетини имкон қадар тезроқ қабул қилиш зарурлигини таъкидлади, Болтиқбўйи мамлакатлари вакиллари эса Европа Иттифоқи 19-пакетни ҳозирданоқ тайёрлашни бошлаши кераклигини билдирмоқда.