Евроиттифоқ Россияга қарши санкцияларни илк бор бир йилга узайтирди

Маълум қилинишича, мазкур ташаббус аввал ҳам бир неча бор муҳокама қилинган бўлса-да, Венгриянинг собиқ бош вазири Виктор Орбаннинг қаршилиги туфайли маъқулланмаган эди. Бу сафар эса май ойида лавозимга киришган янги Венгрия бош вазири Петер Мадяр санкцияларни узайтиришни қўллаб-қувватлади. Натижада ЕИ давлатлари ўртасида консенсусга эришилди.

Европа Кенгаши раиси Антониу Кошта матбуот котибининг маълум қилишича, санкцияларни бир йилга узайтириш ҳақидаги қарор яқин ҳафталарда Европа Иттифоқи Кенгаши томонидан расман тасдиқланиши кутилмоқда.

Шу билан бирга, Брюссел саммитида Россия-Украина урушига оид қўшма декларация ҳам қабул қилинди. Ҳужжатни ЕИга аъзо барча 27 давлат қўллаб-қувватлади. Бу эса 2024 йил декабридан бери биринчи марта барча давлатларнинг ягона позицияда чиқиши бўлди.

Декларацияда Евроиттифоқ Россияга нисбатан босимни янада кучайтириш, унинг ҳарбий иқтисодиётини заифлаштириш ва Москвани мазмунли тинчлик музокараларига жалб қилиш ниятида экани таъкидланган. Шунингдек, Россиянинг энергия ресурслари экспортидан тушаётган даромадларини қисқартириш, жумладан, “соя флоти” деб аталувчи кемалар фаолиятига қарши чораларни кучайтириш муҳимлиги қайд этилган.

Ҳужжатда Россияга қарши 21-санкциялар пакетини тезроқ қабул қилишга чақириқ ҳам ўрин олган. Ҳозирча ушбу пакетнинг аниқ мазмуни ва қабул қилиш санаси маълум қилинмаган. Бироқ Европа оммавий ахборот воситалари унга Украинадаги урушда иштирок этаётган россиялик ҳарбийлар учун Евроиттифоқ ҳудудига кириш тақиқлари, Рус православ черкови раҳбари патриарх Кирилл, шунингдек, Халқаро шахмат федерацияси президенти Аркадий Дворковичга нисбатан чекловлар киритилиши мумкинлигини ёзмоқда.

Бундан ташқари, янги санкциялар энергетика, молия, савдо соҳалари ҳамда илк бор балиқчилик тармоғини ҳам қамраб олиши мумкин.

Айни пайтда Болгария президенти Румен Радев Россияга қарши янги санкциялар пакетига вето қўйиши мумкинлигини билдирди. У бу қарорни мамлакат иқтисодиётига эҳтимолий салбий таъсир ва патриарх Кириллга қарши чекловларга нисбатан эътирозлар билан изоҳлади. Шунга қарамай, Радев Болгария Украинанинг Евроиттифоққа аъзо бўлиш бўйича музокараларини қўллаб-қувватлашини таъкидлади.