БМТ маърузаларини деярли ҳеч ким ўқимаслиги ҳақида маъруза эълон қилди

Бирлашган Миллатлар Ташкилотининг самарадорликни ошириш ва харажатларни камайтириш йўлларини излашга бағишланган маърузасида ташкилот маърузалари камдан-кам ўқилиши таъкидланади. Бу ҳақда Reuters хабар берди.

Ташкилот бош котиби Антониу Гутерриш маълумотларига кўра, 2024 йилда БМТ тизими 240 та орган иштирокида 27 мингта йиғилиш ўтказилишини таъминлаган, котибият эса 1100 та маъруза тайёрлаган - бу 1990 йилга нисбатан 20 фоизга кўпдир.

«Кўп сонли йиғилишлар ва маърузалар тизимни ва барчамизни анча толиқтирди. Бу маърузаларнинг кўпини кам одам ўқийди. Ҳар бешинчи маъруза 1000 мартадан кам юклаб олинади. Юклаб олиш эса ўқиш дегани эмас», деди Гутерриш.

Шу муносабат билан Гутерриш мажлисларни камроқ ўтказиш ва маърузаларни камроқ тайёрлашни таклиф қилди. Унинг сўзларига кўра, фақат барча мандатлар талабларига тўлиқ жавоб берадиган маърузалар тайёрланиши керак.