Европа Иттифоқи Қозоғистонга қарши санкциялар жорий этиш имкониятини ўрганмоқда

Европа Иттифоқи (ЕИ) Қозоғистонга қарши иккиламчи санкцияларни биринчи марта қўллаш имкониятини кўриб чиқмоқда, деб ёзди Bloomberg ўз манбаларига таяниб.

Нашр маълумотларига кўра, санкциялар қўлланилган тақдирда, қурол ишлаб чиқариш учун мўлжалланган ускуналарни Қозоғистонга етказиш тақиқланади. ЕИ Қозоғистон ушбу ускуналарни катта ҳажмда Россияга қайта йўналтираётганини даъво қилмоқда.

Агентлик суҳбатдошларининг таъкидлашича, қарор ҳали қабул қилинмаган, бунинг учун Европа Иттифоқига аъзо барча мамлакатларнинг далиллари ва қўллаб-қувватлаши керак.

Таклиф этилаётган чоралар Европа Иттифоқининг Россияга қарши санкцияларининг ҳозир муҳокама қилинаётган 19-пакетининг бир қисми бўлиши мумкин. Янги пакет, шунингдек, Россия банклари ва нефт компанияларига қарши чекловларни кучайтиришни, «яширин» флот танкерларини қайта суғурталашни тақиқлашни, учинчи мамлакатлар нефт трейдерларига қарши санкцияларни ва Россия ҳарбий саноатида ишлатилиши мумкин бўлган товарларни экспорт қилишни тақиқлашни ўз ичига олади.

Қозоғистоннинг бир қатор компаниялари илгари ҳам Европа Иттифоқи ва АҚШ санкция рўйхатларига киритилган. Бироқ энди бутун мамлакатга қарши иккиламчи санкциялар биринчи марта муҳокама қилинмоқда.