Шимолий Кипрда Эрдўғаннинг рақиби ва оролни бирлаштириш тарафдори ғалаба қозонди

Тан олинмаган Шимолий Кипр Турк Республикаси (ШКТР) президенти сайловида мухолифатдаги Туркия Жумҳурият партияси етакчиси Туфан Эрҳюрман 63 фоизга яқин овоз билан ғалаба қозонди. Унинг рақиби, Туркия томонидан қўллаб-қувватланаётган ва Кипрнинг бўлиниши тарафдори бўлган амалдаги президент Эрсин Татар тахминан 36 фоиз олди.

Туркия Жумҳурият партияси Туркиянинг амалдаги президенти Ражаб Тоййиб Эрдўғанга мухолифат ҳисобланади.

Эрҳюрман натижаларни «Кипр туркларининг умумий ғалабаси» деб атади ва Туркия билан яқин муносабатларни сақлаб қолишга ваъда бериб, хавотирга ўрин йўқлигини таъкидлади. Шунингдек, оролни бирлаштириш бўйича музокараларни қайта бошлаш ниятида эканини маълум қилди.

Эрҳюрманнинг ғалабаси муҳим сиёсий бурилиш сифатида қаралмоқда: Кипр масаласини федератив ҳал қилиш тарафдори бўлган мухолифат номзоди етакчи позицияга чиқди.

Бу геосиёсий динамикага таъсир қилиши мумкин: ШКТР Туркияга жуда боғлиқ ва Эрҳюрманнинг курси Анқара ва Кипрнинг иккинчи (юнонзабон) қисми билан муносабатларни қайта кўриб чиқишга олиб келиши мумкин.

Эрҳюрман жамоаси ислоҳотлар, фуқаролик жамиятининг кўпроқ иштироки, тайинлашнинг шаффофлиги ва Европа Иттифоқи билан ҳамкорликни ваъда қилмоқда.

Шимолий Кипр Турк Республикаси қисман тан олинган давлат бўлиб, аҳолиси 300 минг кишидан кам бўлган Кипр оролининг шимолий учдан бир қисмини эгаллайди. Фақат Туркия томонидан тан олинган ва унинг иқтисодий, сиёсий ва ҳарбий ёрдамига жуда боғлиқ. Туркия Шимолий Кипрда ўз қўшинлари контингентини жойлаштирган, Кипр Республикаси ва БМТ уни оккупацион куч деб ҳисоблайди. ШКТР Ислом ҳамкорлик ташкилоти ва Туркий давлатлар ташкилотида кузатувчи мақомига эга.