Трамп: Путиннинг “Буревестник” синовлари ҳақидаги баёноти ноўрин

Дональд Трамп душанбага ўтар кечаси, 27 октябр куни Air Force One бортида журналистларга: “У урушни тугатиши керак”, — деб баёнот берди.

“Бир ҳафтада тугаши керак бўлган уруш тўртинчи йилдан бери давом этяпти. Ҳозир айнан шу билан шуғулланиши лозим, ракеталарни синаш билан эмас”, — дея қўшимча қилди Трамп.

У, шунингдек, Россия таҳдидларига жавобан АҚШ ядровий сувости кемаларининг ҳаракатланиши ҳақида эслатди: “Улар билади: дунёдаги энг яхши ядровий сувости кемаси уларнинг қирғоқлари ёнида. Демак, ракета 8 000 миля парвоз қилиши шарт эмас. Улар биз билан ўйин ўйнамаяпти, биз ҳам улар билан. Биз доим ракеталар синовини ўтказамиз, лекин айтганимдек, бизда ядровий субмарина бор — бундай узоқ масофага отиш шарт эмас”, — деди АҚШ президенти.

Шу орада РФ ТИВ раҳбари Сергей Лавров Владимир Путиннинг Украина бўйича АҚШ концепциясини қабул қилишга ва “таклиф этилган асосда амалий жиҳатдан олға силжишга” тайёр эканини баёнот қилди. Унинг қўшимча қилишича, Москва ва Вашингтон таклифларни ўйлаб кўриш учун танаффус олишга келишиб олган.

Аввалроқ Кремл сайтида Путиннинг стратегик ҳужумкор кучлар машғулоти ҳақидаги баёноти эълон қилинди. Унга кўра, “стратегик ядровий кучларнинг уч таркибий қисми бўйича ўқув-жанговар парвозлар” бажарилган ҳамда “истиқболли қурол-аслаҳа намуналари” — ядровий қурилмали, чексиз масофали “Буревестник” қанотли ракета — синовдан ўтказилган. Путин “Буревестник”ни ноёб ишланма деб атади ва уни қўллашнинг “эҳтимолий усулларини аниқлаш” режаларини айтди.

Ўз навбатида РФ Бош штаб бошлиғи Валерий Герасимов “Буревестник” синови 21 октябр куни ўтганини, ракета 14 000 км масофани босиб ўтганини ва тахминан 15 соат ҳавода бўлганини маълум қилди. Унинг сўзларича, ракета “исталган масофада юқори даражада ҳимояланган объектларга кафолатли аниқлик билан зарба бериш” имконига эга. “Буревестник” бўйича мустақил тасдиқ ёки Ғарб ҳарбийларидан изоҳлар йўқ.

НАТОда Skyfall деб аталадиган “Буревестник” ўн йилдан ортиқ вақтдирки ишлаб чиқилмоқда. РФ ҳарбийлари у двигателга ўрнатилган кичик ядровий реактордан қувват олишини, назарий жиҳатдан бир неча кун ҳавода қолиши мумкинлигини айтади. Ядровий таҳдид бўйича Вашингтон ташаббуси — Nuclear Threat Initiative (NTI)нинг 2019 йилги ҳисоботига кўра, Skyfall “ядровий бошқарув қисми ташийди, Ер шарини паст баландликда айланиб учади, ҲҲМ тизимларини айланиб ўтади ва релъефдан яшириниб, сўнг белгиланиши қийин бўлган нуқтага зарба беради”, деб баҳоланган.