Tesla’нинг собиқ раҳбари Хитойда янги одамсимон роботни тақдим этди

Хитойдаги Star Dynamics компанияси ўзининг илк гуманоид роботини — Star Dynamics 1 ни намойиш этди. Лойиҳани Tesla China’нинг собиқ раҳбари ва Matrix Intelligence асосчиси Чжан Хайсин бошқармоқда — у аввал Tesla Optimus роботини яратишда ҳам иштирок этган.

Фото: Tesla

Чжаннинг сўзларига кўра, Star 1 инсонга ўхшаш қилиб ишлаб чиқилган ва у тўғридан-тўғри Tesla Optimus, Figure ҳамда 1X каби ғарб роботларига рақобатчи сифатида яратилган. Роботнинг ташқи кўриниши инсонга жуда яқин — танасида ҳеч қандай очиқ сим ёки бўғинлар кўринмайди. Унинг ранги олтин тусда, бу эса Optimus V2.5 дизайнини эслатади.

Star Dynamics компанияси икки йирик ташкилот — Hongrun Construction (60%) ва Matrix Intelligence (40%) ҳамкорлигида ташкил этилган. Янги робот сунъий интеллект асосида ишловчи индустриал ва хизмат кўрсатиш тизимларини яратиш бўйича узоқ муддатли лойиҳанинг бир қисми ҳисобланади.

Хайсин таъкидлашича, ҳозирда Figure ва 1X каби компаниялар роботларни турмуш шароитида синовдан ўтказаётган бўлса-да, инсонсимон роботларнинг оммавий ҳаётга кириб келиши учун ҳали бир неча йил керак бўлади. Компания ҳозирча роботнинг чиқиш санаси ва техник хусусиятларини ошкор этмаган.