Путин 2025 йилда Федерал мажлисга мурожаат қилмайди – ОАВ

Ҳукуматдаги учта манбага кўра, Кремль ҳозир мурожаатга тайёргарлик кўрмаяпти.

Фото: Ведомости

Россия президенти Владимир Путин 2025 йилда Федерал мажлисга йиллик мурожаат билан чиқмайди, деб хабар берди Faridaily нашри.

Ҳукуматдаги учта манбага кўра, ҳозир мурожаатга тайёргарлик кўрилмаяпти. Декабрь ойида Путиннинг анъанавий йиллик матбуот анжумани «бевосита линия» билан биргаликда ўтказилиши эълон қилинди ва Кремль яна бир йирик тадбир ўтказишга қарор қилиши даргумон, деб таъкидлади Faridaily суҳбатдошлари.

Федерал мажлисга мурожаат қилиш Россия президентининг конституциявий мажбурияти бўлиб, бу 84-моддада белгиланган.

2025 йилги Мурожаатнома дастлаб февраль ойида эълон қилиниши режалаштирилган эди. Faridaily манбаларининг хабар беришича, у кечиктирилди, чунки Путин Оқ уйга қайтган Доналд Трамп билан тез орада учрашишга умид қилган ва унинг бутун эътибори учрашувга тайёргарлик кўришга қаратилган (натижада президентлар фақат август ойида учрашди).

2022 йилда Россия Украинага кенг кўламли босқинни бошлаганида ҳам Путин мурожаат билан чиқмади. Кремль буни уруш шароитида «динамик» ва тез ўзгарувчан вазият билан изоҳлади.

Тайёрлаган: Сардор Юсупов

#Россия #Владимир Путин #Мурожаатнома