Олимпиада чемпиони Диёра Келдиёрова ҳақидаги “Диёра. Нозик йўл” хужжатли фильми яратилди

Тошкентда аёллар дзюдоси тарихида биринчи марта Олимпиада олтини қўлга киритган спортчи — Диёра Келдиёрова ҳақида суратга олинган “Диёра. Нозик йўл” ҳужжатли фильми намойиш этилди. Премьера 17 ноябрь куни Cinematica кинотеатрида бўлиб ўтди. Тадбирда спорт жамоатчилиги, мутахассислар ва оммавий ахборот воситалари вакиллари иштирок этди. Томошабинлар ушбу филмни 20 ноябрдан бошлаб Kinopoisk платформасида томоша қилишлари мумкин.

Ҳужжатли фильм замонавий ўзбек спортининг энг ёрқин вакилларидан бири бўлган Келдиёрованинг спортчи сифатида шаклланиш жараёни, спортга келиши ва унга олиб борган нозик, бироқ матонатли йўлини ёритиб беради. Картинада Диёранинг фақатгина ғалабалари эмас, балки жамиятда узоқ вақт “эркаклар спорти” сифатида қабул қилинган соҳада ўз ўрнини топган аёл сифатидаги ички кураши ҳам акс этган.

2024 йилги Олимпиадада қўлга киритилган ғалаба Ўзбекистон спорт тарихида янги саҳифа очди. Диёранинг олтин медали — мамлакатимиз тарихида аёл дзюдочи томонидан олинган илк Олимпиада олтини сифатида қайд этилди. Энг таъсирли дақиқалардан бири 1/8 финалда беш йил давомида мағлуб бўлмаган япон спортчиси Ута Абени таслим этган пайт бўлди. Шундан сўнг у Германия ва Косово вакилларидан устун келиб, финалга йўл очди.

Фильм муаллифлари спортчининг йўли орқали аёл мустаҳкамлиги, эркинлик, оилавий қўллаб-қувватлаш ва жамият стереотипларига қарши кураш мавзуларини очиб беради. Томошабин фильм орқали Диёранинг нафақат спортдаги, балки шахсий ҳаётидаги энг муҳим бурилиш нуқталарини ҳам кўра олади.

Лойиҳа Сардор Кази томонидан Kinopoisk ва Yandex Uzbekistan ҳамкорлигида суратга олинган. Картина MOC ижодий продюсерлик маркази томонидан ишлаб чиқарилган бўлиб, режиссёрнинг биринчи тўлақонли ҳужжатли фильми ҳисобланади.

“Биз ўзбек спортининг ёрқин номлари ҳақида ҳикоя қилувчи лойиҳаларни қўллаб-қувватлаётганимиздан фахрланамиз. Бундай ҳужжатли филмлар тарихни сақлаб қолиш билан бирга, янги марралар сари илҳом бағишлайди”, — дейди Иззат Шукуров, Yandex Ўзбекистон раҳбари.

20 ноябрдан бошлаб “Диёра. Нозик йўл” филмини Kinopoisk платформасида онлайн томоша қилиш мумкин бўлади.