Путин кўчалардаги курьерлар ҳаракатини тартибга солишни талаб қилди

Россия президенти Владимир Путин Инсон ҳуқуқлари бўйича кенгаш аъзолари билан учрашувда баъзида «ҳеч кимга сездирмасдан», қўриқчиларсиз машина ҳайдаши ҳақида гапириб берди.

«Қанчалик ғалати туюлмасин, мен доим ҳам мигалка ва сигналлар билан юрмайман», – деган Путин баъзида ҳеч қандай кортежларсиз, «ҳеч кимга сездирмасдан» машина ҳайдаши ҳақида. У бу сўзлар билан «Русский репортер» журнали муҳаррири ўринбосари, кенгашда чиқиш қилган Марина Ахмедованинг сўзларига муносабат билдирган, ушбу журналист йўлларда электр самокатлар ва электр велосипедларда ҳаракатланаётган курьерлар пиёдалар учун хавф туғдираётгани ҳақида гапирганди.

«Доставка хизмати билан нималар бўлаётганини кўриб турибман. Албатта, бу фуқароларимизни ташвишга солмоқда. Бу ҳақда менга айрим регионлар раҳбарлари, хусусан, Санкт-Петербург губернатори гапириб берди», – дея РФ президенти сўзларини келтиради РБК.

У курьерлар электр транспорт воситаларида ҳаракатланиш орқали фуқаролар учун хавф туғдираётгани ҳақидаги фикрга қўшилган. «Табиийки, аввало маҳаллий, минтақавий ҳукуматлар бу масалани ҳал қилиб олишлари керак», – деган у.

Путин ИИВга ва регионлар раҳбаларига доставка хизматлари фаолиятини тартибга солиш бўйича топшириқ беришни ваъда қилган.

Декабр ойи бошида Москва мэри Сергей Собянин расмийлар шаҳарда электр самокатлар ва бошқа индивидуал ҳаракатланиш воситалари (СИМ)дан фойдаланишни тақиқлашни режалаштирмаётганини айтганди. Унинг таъкидлашича, москваликларнинг қарийб 80 фоизи ишда ушбу транспорт туридан тез-тез фойдаланадиган курьерлар хизматидан фойдаланади. У шаҳардаги вазиятни назорат қилиш мақсадида курьерлар учун мажбурий стандартлар жорий этилганини таъкидлаган.

«Дептранс» маълумотига кўра, 2025 йилнинг тўққиз ойида Москвада бундай транспорт воситалари иштирокидаги авариялар сони ўтган йилнинг шу даврига нисбатан 44 фоизга камайган. Шу билан бирга, бундай воситалардан фойдаланиш ҳолатлари сони 3 миллионга ошган.

Россиянинг бир қанча шаҳарларида электр самокатлардан фойдаланиш тақиқланган ёки чекланган. Москванинг бир қатор ҳудудларида соат 12:00 дан 23:59 гача электр самокатлардан фойдаланиш тақиқланган. Благовешченскда эса у бутунлай тақиқланган.

Транспорт вазирлиги индивидуал ҳаракатланиш воситаларини бошқариш ҳуқуқини олишга эҳтиёж сезмаяпти. Шу билан бирга, идора барча бундай воситалар учун қўшимча тартибга солиш меъёрларини жорий этиш тарафдори. Ўтган йили вазирлик 2026 йил 1 сентябрдан бошлаб барча бундай индивидуал ҳаракатланиш воситаларини федерал реестрда рўйхатдан ўтказиш, «ҳисоб рақами» (автомобил давлат рақами аналоги) ва «ҳисоб белгиси» (QR-код) олишни жорий этишни таклиф қилганди.

Шунингдек, расмийлар уларнинг тротуарларда ҳаракатланишини тақиқлаш ва тезликни чеклашни муҳокама қилмоқда. Тергов қўмитаси эса барча самокатчиларни ҳайдовчиларга тенглаштириш зарур деб ҳисоблайди.