48 жабрланувчига 12,5 млрд сўм зарар – “Bilol's motors” автосалони раҳбари 9 йилга қамалди

ЖИБ Яккасарой туман судида “Bilol's motors” автосалони раҳбари Билол Мамажоновга нисбатан қўзғатилган жиноят иши кўриб чиқилиб, ҳукм ўқилди. Kun.uz суд ҳужжати билан танишди.

1989 йилда туғилган Билол Мамажонов Тошкент шаҳрида давлат рўйхатидан ўтказилган “Bilol’s electric motors” МЧЖнинг таъсисчиси ва раҳбари бўлган. МЧЖ автомобиллар ва енгил моторли транспорт воситалари чакана савдоси билан шуғулланиб келган. Билол Мамажоновга нисбатан фиригарлик айби билан жиноят иши қўзғатилган ва у 2024 йил декабр ойида қамоққа олинган.  

Суд ҳукмида келтирилишича, Билол Мамажонов шериклари билан (жиноят ишининг уларга оид қисми алоҳида иш юритувига олинган) тил бириктириб, машина олиб бериш алдови асосида фуқаролар пулини ўзлаштирган. Аммо ваъдасини бажармасдан, машина учун тўлов қилинган пулларни ўз эҳтиёжларига сарфлаб юборган.

Жумладан, Билол Мамажонов жабрланувчи Ф.С.га “30 иш куни, кўпи билан 80 кун мобайнида BYD song plus Champion русумли автомашина сотиб олиб бериши ҳақида”ги ёлғон маълумот бериб, уни алдаган. Автосалон раҳбарига ишонган фуқаро 2024 йил 17 августда  шартномани тузиб, жами 328 млн сўм тўлаган. Аммо Билол Мамажонов берган ваъдасини бажармасдан, тўланган пулларни ўз эҳтиёжларига сарфлаган. 

Шу тариқа Билол Мамажонов ва унинг шериклари 48 та ҳолатда Хитойдан BYD song plus Champion, BYD yuan Up, BYD sea Lion, BYD E2, Lepmotor C16, Hongqi E-QM5, Lixiang L9 каби машиналарни келтириб бериш алдови билан жабрланувчиларни қарийб 13 млрд сўмга чув туширган.     

Билол Мамажонов судда айбига иқрор бўлмаган ва пулларни Хитойдан машина олиб келиш учун Ванг исмли шахсга берганини айтган.   

“Жамият ҳисобрақамига тўланган пулларни моддий ёрдам кўринишида ўзимга тегишли бўлган банк пластик картасига туширган ҳолда нақдлаштириб олганман ҳамда барчасини автомашина олиб келиб бериши учун хитойлик Ванг исмли шахсга бериб юборганман. Пулларни Вангга берганимни тасдиқловчи далилларим мавжуд эмас.

Ванг билан 2024 йил бошида танишганман. У мен раҳбарлик қилиб келган “Bilol’s electric motors” МЧЖ офисига келиб турган. Менга арзон нархларда автомашина олиб келишини айтган. Мен мижозларга машиналарни 80 ёки 85 иш кунида олиб келишимни айтиб, шартномани тузганман. Ушбу ҳолат шартномада ҳам ўз аксини топган. Жамиятимда 1 нафар ходим ишлаган. Мижозлардан пулни ўзим олганман. Айрим ҳолда Камила исмли ходимим нақд кўринишда олган, бироқ мен ундан ушбу пулларни олганман. Ходимларимнинг ушбу пулларга умуман алоқаси йўқ.

Автомашина олиб келиб топширилгандан сўнг мижоз қолган пулларни тўлаши лозим бўлган. Мени 2024 йил 12 декабр куни қамаб қўйишди. Мижозларга буюртма берилган автомашиналар 2024 йил декабр ойи охирида келиши керак эди. Мен қамалганимдан кейин нима ҳолат бўлганини билмайман. Ванг исмли шахсга 2024 йил июл ойидан пул беришни бошлаганман. У томонидан менга ҳали автомашина юборилмаган”, деган Билол Мамажонов суддаги кўрсатмасида.

Шунингдек, автосалон раҳбари ушбу ҳолатларнинг барчаси иқтисодий ёки фуқаролик муносабатлари эканини айтиб, суддан адолатли ҳукм чиқаришни сўраган. 

Жиноят ишининг Ванг исмли шахсга ҳамда бошқаларга оид қисми алоҳида иш юритувига олинган.   

Суд ҳукми билан Билол Мамажонов Жиноят кодексининг 168-моддаси 4-қисми “а” бандида назарда тутилган жиноятни (жуда кўп миқдорда фирибгарлик) содир этганликда айбли деб топилган. Унга 9 йил муддатга озодликдан маҳрум қилиш жазоси тайинланган.

Билол Мамажоновдан 46 нафар жабрланувчи ва битта фуқаровий даъвогар фойдасига қарийб 12,5 млрд сўм ундириш белгиланган. “Bilol’s electric motors” МЧЖ номига расмийлаштирилган, 170 млн сўмга баҳоланган Volkswagen E Bora машинаси сотувга қўйилиши, автомобил сотувидан тушган пул жабрланувчилар фойдасига қаратилиши белгиланган. 

Аввалроқ “Bilol's motors” автосалони раҳбари устидан суд бошлангани хабар қилинганди. Жабрланувчилардан бири судда қатнашган Kun.uz журналистига ўғли билан 3-4 йил Россия совуғида қийинчилик кўриб, 4-5 сўм пул топганини, кейин машина олиш мақсадида “Bilol's motors”га тўлов қилиб, алданиб қолганини айтганди.