Ўзбекистон ва Япония парламентлари алоқаларини фаоллаштириш масалалари кўриб чиқилди

Ўзбекистон президенти Шавкат Мирзиёев Японияга расмий ташрифи доирасида ушбу мамлакат парламенти Маслаҳатчилар палатаси президенти Масаказу Секигучи билан учрашди. Учрашувда икки давлат ўртасидаги стратегик шериклик ва кўп қиррали ҳамкорликни ривожлантиришда парламентлар муҳим ўрин тутиши таъкидланди.

Фото: Президент матбуот хизмати

Музокараларда парламентлараро алоқаларни янада фаоллаштириш ва амалий ҳамкорликни кенгайтириш масалалари муҳокама қилинди. Хусусан, Маслаҳатчилар палатаси вакиллари жорий йил апрель ойида Тошкентда бўлиб ўтган Парламентлараро иттифоқнинг 150 йиллигига бағишланган сессияда фаол иштирок этгани қайд этилди.

Томонлар ёшларнинг парламентга оид ташаббусларини қўллаб-қувватлашга алоҳида эътибор қаратдилар. Жумладан, Ўзбекистон–Япония ёшлар парламентлари аъзолари форумини ўтказиш, шунингдек, 2026 йилда Самарқандда бўлиб ўтадиган Ёшлар парламентлари аъзолари глобал конференциясида Япония делегациясининг иштирок этиши масалалари кўриб чиқилди.

Учрашувда парламентлар олий даражада эришилган келишувларни, энг аввало савдо-иқтисодий, молиявий, инвестициявий, технологик ва маданий ҳамкорликни кенгайтириш бўйича режаларни амалга оширишга ҳар томонлама кўмаклашиши муҳимлиги таъкидланди.