ФИФА ЖЧ-2026 чипталарига талаб рекорд даражага етганини эълон қилди

Халқаро футбол федерацияси (ФИФА) АҚШ, Канада ва Мексикада бўлиб ўтадиган 2026 йилги футбол бўйича жаҳон чемпионати чипталарига мухлисларнинг мисли кўрилмаган қизиқишини қайд этди. Бу ҳақда ФИФА президенти Жанни Инфантино халқаро спорт форумида сўзлаган нутқида маълум қилди, деб хабар берди Reuters.

Инфантино сўзларига кўра, ФИФА чипталарни олдиндан сотишга тайёргарликнинг дастлабки 15 кунида бутун дунёдан уларни сотиб олиш учун 150 миллионга яқин ариза олган. Ташкилот раҳбари таъкидлаганидек, ҳар куни ўртача 10 миллионга яқин сўров рўйхатга олинган, бу жаҳон футбол мусобақалари учун мутлақ рекорддир.

«Биз олти-етти миллион чиптани сотувга қўйдик ва атиги 15 кун ичида 150 миллионга яқин сўров олдик. Бу жаҳон чемпионати қанчалик кучли ва глобал воқеа бўлиб қолаётганини кўрсатади», деди Инфантино.

Шунингдек, унинг аниқлик киритишича, энг ариза АҚШ, Германия ва Буюк Британиядан келиб тушган. Шу билан бирга, ўнлаб мамлакатлар, жумладан, илгари чипталарга бундай оммавий талабни намойиш этмаган минтақа мухлислари ҳам турнирга қизиқиш билдирмоқда.

2026 йилги жаҳон чемпионати турнир тарихидаги энг йирик мусобақа бўлади. Финал босқичида илк бор 48 та миллий жамоа, жумладан Ўзбекистон ҳам иштирок этади. Ўйинлар сони 104 тага етказилган. Ўйинлар бир вақтнинг ўзида учта мамлакатда - АҚШ, Канада ва Мексикада бўлиб ўтади, бу ҳам тарихий ҳодисадир.

ФИФА турнирнинг кенгайтирилган формати янги томошабинларни жалб қилиш ва мусобақанинг тижорий таъсирини кучайтириши кутилмоқда. Инфантино сўзларига кўра, дастлабки аризалар босқичидаёқ чипталарга бўлган рекорд даражадаги қизиқиш ЖЧ-2026 давомат ва глобал қамров бўйича янги рекордларни ўрнатиши мумкинлигини тасдиқлайди.

Ташкилотчиларнинг таъкидлашича, чипталарни сотиш жараёни бир неча босқичда амалга оширилади ва катта талаб туфайли аризаларнинг катта қисми қондирилмайди. Ишқибозларга чайқовчилар ва фирибгарларнинг қурбонига айланиб қолмаслик учун ФИФА расмий эълонларини кузатиб бориш тавсия этилди.